Қызылордада бір күнде 60 отбасы үйлі болды
ҚЫЗЫЛОРДА. KAZINFORM — Амал күнінде қызылордалық 60 отбасы қоныс тойын тойлады.
Облыс әкімі Нұрлыбек Нәлібаев кеше жаңа қоныс иелеріне Қызылорда қаласындағы 60 пәтерлік тұрғын үйдің кілтін табыстады. Аймақ басшысы оларды Амал күнімен және алдағы Наурыз мейрамымен құттықтап, өңірдегі ауқымды жобаларға тоқталып өтті.
— Мемлекет басшысы Қасым-Жомарт Кемелұлы халықты тұрғын үймен қамтамасыз ету мемлекеттің әлеуметтік саясатының басым бағыты екенін атап өтті. Президентіміздің, Үкіметтің ерекше қолдауының арқасында бүгінде облысымыздың бюджеті 750 млрд теңгеге жетті. Өздеріңіз білесіздер, осыдан үш жылдай уақыт бұрын аймақ бюджеті 364 млрд теңге болатын. Өсім 206 пайызды құрады. Бұл қомақты қаражат аймақтағы ең өзекті деген мәселелерді шешуге, тұрғындардың өмір сүру сапасын жақсартуға және ауқымды инфрақұрылымдық жобаларды іске асыруға жұмсалуда. Мемлекеттің қолдауын сезініп, баспаналы болуға ниет еткен әрбір отбасы үшін бүгін айтулы күн! Баспаналы болу отбасын, әсіресе, балаларды қуанышқа кенелтеді. Қоныс тойларыңыз құтты болсын!, — деді облыс әкімі.
Ал біз бұған дейін биыл елімізде рекордтық көлемде тұрғын үй пайдалануға берілетінін айтқанбыз.
