Қызылордада екі күнде 29 шетелдік ел аумағынан шығарылды

ҚЫЗЫЛОРДА. KAZINFORM — Заңсыз көші-қонның алдын алу және оны болдырмау, шетелдіктердің көші-қон заңнамасын бұзу фактілерін анықтау мақсатында 17-20 наурыз аралығында облыс аумағында «Мигрант» жедел-профилактикалық іс-шарасы өтіп жатыр. 

Облыстық полиция департаментінің баспасөз қызметі хабарлағандай, іс-шараның екі күнінде 172 құқықбұзушылық анықталды.

— Оның ішінде шетел азаматтары тарапынан 53 әкімшілік құқықбұзушылық тіркеліп, 29-ы ел аумағынан шығарылды. Шетелдіктердің Қазақстанда болу ережелерінің сақталуын қамтамасыз етпеген Қазақстан Республикасының 63 азаматына қатысты әкімшілік шаралар қолданылды, — делінген хабарламада. 

Полиция облыс тұрғындарынан шет мемлекеттерден жұмыс істеуге келген азаматтардың заңда белгіленген мерзімде құжатын рәсімдеп, көші-қон заңнамасының талаптарын сақтауды сұрап отыр. Олай болмаған жағдайда ел заңнамасына сәйкес тиісті шаралар қолданылатынын ескертті. 

Ал Түркістан облысында рейдтік іс-шара кезінде көші-қон заңын бұзудың 300-ден аса дерегі тіркелді.