Қызылордада кей ұжымдар жұмысқа ұлттық киіммен барып жүр
ҚЫЗЫЛОРДА. KAZINFORM — Қызылордада бірқатар еңбек ұжымдары жұмысқа жаппай ұлттық киіммен баратын болған.
Соның бірі — облыстық тілдерді оқыту орталығы. Мұнда 30 шақты адам қызмет етеді.
Орталық қызметкерлері біраз бұрын классикалық киім үлгісін бірыңғай көк түсті шапан мен қамзолға ауыстырды.
— Әріптестерім ұлттық құндылығымызды насихаттау мақсатында жұмыс орнында қазақы нақыштағы киім киюді жалғастыруда. Бұл бастама қазақы дәстүр мен мәдениетті дәріптеуге, ұлттық сана-сезімді нығайтуға бағытталған. Біз тек киім үлгісімен ерекшеленбейміз. Сондай-ақ іс-шаралар, ашық сабақтар мен тәрбиелік мәні зор кездесулер арқылы да ұлттық құндылықтарды дәріптеуге үлес қосып жүрміз, — дейді орталық директоры Мартана Дәулетбаева.
Қорқыт ата атындағы Қызылорда университетінде көктемнің алғашқы күнінен бастап Наурыз мейрамын ұлықтау, ұлттық құндылықтарды насихаттауға бағытталған іс-шаралар жалғасып келеді.
Соның бірі — 4-22 наурыз аралығына белгіленген ұлттық киім күні. Оқу орнының қызметкерлері мен студенттері күнделікті ұлттық үлгіде киініп, Наурыз мейрамының сәнін келтіріп жүр.
— Жалпы университетте Ұлыстың ұлы күні қарсаңында ғана емес, әр жұма ұлттық киім күні ретінде белгіленген. Соңғы екі жылдан бері бұл үрдіс оқытушылар мен студенттер арасында жоғары деңгейде дәріптеліп келеді, — деді университеттің медиа орталығының жетекшісі Назерке Шарападин.
Қазақы нақышта киіну үрдісі облыс мектептерінде кең таралған. Қызылорда қаласындағы
А.Байтұрсынұлы атындағы № 211 орта мектеп ұжымы да жаппай оюлы оқу формасына көшті.
— Бірінші сынып оқушылары осы оқу жылынан бастап бірыңғай ұлттық үлгіде киінді. Қазір оларға ілесіп бастауыш сыныптар түгел дерлік классикалық үлгідегі ұлттық киіммен сабаққа қатысады. Ал 1 наурыздан бастап бүкіл ұжым бір ай бойы ұлттық киіммен жүреді, — деді мектеп директоры Айжан Әлімова.
Бұған дейін хабарлағанымыздай, шымкенттік дәрігерлер жұмысқа ұлттық киіммен келе бастады.
