Қызылордада тұрғын үй мен газдандыру көрсеткіші артып келеді

ҚЫЗЫЛОРДА. KAZINFORM – Қызылордада тауарлық газды бөлшек саудада өткізу қызметінің бағасы көтерілуі мүмкін.

Бұл туралы «QazaqGaz Aimaq» АҚ Қызылорда өндірістік филиалында өткен жария тыңдауда белгілі болды. Оған ҚР ҰЭМ Табиғи монополияларды реттеу комитеті облыс бойынша департаментінің мамандары, облыстық мәслихат депутаттары, қоғамдық кеңес мүшелері және өзге де жауапты мекеме өкілдері қатысты. 

Өндірістік филиал директоры Айбек Ерғали бағаны өзгерту себебін облыста тұрғын үй құрылысы мен елді мекендерді газдандыру көрсеткішінің артуымен байланыстырды.

- 2020 жылмен салыстырғанда ол былтыр 22,5%-ға ұлғайды. Атап айтқанда, төрт жылдың ішінде 34 елді мекен газға қосылған. Бүгінде өңірде абоненттер саны 144 мыңнан асады. Қазір тауарлық газды бөлшек саудада өткізу қызметінің бағасы 20 теңге болса, оны тағы да 2,9 теңгеге қымбаттатуға өтінім берілді. Бұл жөнінде нақты шешімді Табиғи монополияларды реттеу комитетінің облыстық департаменті қабылдайды, - деді филиал басшысы. 

Бұған дейін біз тауарлық газдың бағасы биылғы жазға қарай біртіндеп өсетінін хабарлағанбыз.