Қызылордалық оқушы «Жыр-домбыра» атты интерактивті құрал жасап шығарды

ҚЫЗЫЛОРДА. KAZINFORM — Қызылордадағы Назарбаев зияткерлік мектебінің 12-сынып оқушысы Сырсұңқар Базарбайұлы қазақтың ұмытылып бара жатқан жыр-дастандарын әлеуметтік желіде насихаттап жүр.

Ол физика-математика бағытында білім алса да көңіліне жақын жыр өнерінен қол үзген емес.

Мектепте шығармашылық концерт өткізіп те үлгерді. TikTok платформасында жыр, терме орындаушысы ретінде өте танымал. Аудиториясы әлдеқашан қалыптасқан. Авторлық туындыларымен тыңдарманын қуантып жүр. 

Республикалық ғылыми жобалар байқауында ұстазы Айгүл Зейнулланың жетекшілігімен дәстүрлі жыр өнерін заманауи технологиялар көмегімен насихаттаудың тиімді жолдарын ұсынды. Талантты жас байқауға өзі әзірлеген «Жыр-домбыра» атты интерактивті құрал мен «Қазақтың жыр өнері» атты авторлық мәдени-танымдық сайтты ұсынды. 

Соның арқасында өзге оқушылардан оза шауып, І орын иеленді. 

— Жобамның ерекшелігі — жасанды интеллект және интерактивті құралдар көмегімен дәстүрлі өнерді насихаттау. Instagram, TikTok әлеуметтік желілерінде блог жүргіземін. Жастар қазір әлеуметтік желіде жиі уақыт өткізеді. Мен осы мүмкіндікті оң жағына пайдаланғым келеді. «Жыр-домбыра» интерактивті құралы домбыраның прототипі іспетті. Тетігін бассаң, жастарға арналған терме-жырлар ойнап қоя береді, — деді Сырсұңқар Базарбайұлы.

Өнерлі өрен сондай-ақ «Қобыланды батыр» жырының сюжетіне сәйкес анимация әзірлеп, оны жыр мазмұны өзгеше стильдегі әуенде ұсынды.

Ал өткен жылы осы мектептің оқушылары қазақ тілін үйренгісі және терең танығысы келген адамдарға арнап «Naqyl söz» қосымшасын ойлап тапты.