Көкшетауда жылыту маусымы басталды

КӨКШЕТАУ. KAZINFORM – Көкшетау қаласындағы барлық әлеуметтік нысан мен тұрғын үйге жылу берілді. 

Қала әкімдігінің мәліметінше, жылыту маусымы 25 қыркүйекке дейін іске қосылды және бірінші кезекте мектептер, балабақшалар, денсаулық сақтау нысандарына жылу берілді. Кейін көпқабатты үйлер, әлеуметтік нысандар қосылды.

Жалпы «Көкшетау жылу» коммуналдық кәсіпорнының РК-1 және РК-2 қазандықтары облыс орталығындағы 5 182 нысанды жылытады, оның 1 401-і әлеуметтік нысандар, ал қалғандары тұрғын үйлер, өнеркәсіп нысандары және өзге де ұйымдар. 

«2024-2025 жылдардағы жылыту маусымына дайындық шеңберінде ҚР Үкіметінің резервінен жалпы сомасы 1 375 млн теңгеге қаражат бөлінді, оның 816 млн теңгесі жылу көздерін, яғни РК-1 екі бу қазандығын жөндеу және РК-2 №8,9,10 шаң-көмір қазандықтарын жөндеуге арналды. Ал 559,029 млн теңге ұзындығы 6 км болатын жылу желілерін жөндеуге бағытталды», - деді әкімдіктен. 

Айта кетсек, бұдан бұрын Көкшетауда жылу тарифі кімдер үшін және қаншалықты өзгеретінін жазған едік.