Конференция лигасы: «Астана» бүгін Кипрдің «Пафос» командасымен кездеседі

АСТАНА. KAZINFORM - Бүгін елордалық «Астана» Конференция лигасы жалпы кезеңінің 3-туры аясында сырт алаңда Кипрдің «Пафос» командасымен кездеседі.

Астана уақымен кездесу 22.45-те басталып, «Qazsport» телеарнасынан тікелей эфирде көрсетіледі.

Аталған ойында шотландиялық төрешілер бригадасы қызмет атқарады. Бас төреші - Дональд Робертсон, оған отандастары Дэвид Рум мен Росс Маклеод көмекшілік жасайды. 

«Пафос» командасы өзімен аттас қалада «АЭП Пафос» және «АЕК Куклиа» командаларының бірігуі нәтижесінде 2014 жылы құрылған. Былтыр өз тарихында алғаш рет Кипр кубогын жеңіп алды. 

Кипрлік клуб еурокубоктағы жорығын Еуропа лигасы бірінші іріктеу сатысынан бастады. Бұл жолы өз алаңында Швецияның «Эльфсборг» командасы 2:5 есебімен жол берсе, сырт алаңда 0:3 есебімен есе жіберді.

Одан кейін Конференция лигасында Литваның «Жальгирис Вильнюс» (1:2, 3:0), Болгарияның ЦСКА 1948 (1:2, 4:0), Румынияның ЧФР (0:1, 3:0) клубтарын қапы қалдырды. Ал Конференция лигасының негізгі кезеңінде Молдованың «Петрокуб» командасын (4:1) есебімен жеңсе, Германияның «Хайденхайм» командасына (0:1) жеңіліп қалды.

Еске салсақ, елордалық «Астана» бұдан бұрын Конференция лигасының жалпы кезеңінде Сербияның ТСЦ клубын (1:0) жеңсе, одан кейін Уэльстің «Нью-Сэйнтс» командасына (0:2) жол берді.