Қорғаныс министрлігінен ескерту: әскери техника жүріп өтеді
АСТАНА. KAZINFORM – 2025 жылғы 2-6 маусым аралығында Қарулы күштердің дайындық жоспарына сәйкес еліміздің бірқатар өңірінде әскери бөлімдер мен құрамалардың жауынгерлік әзірлігін тексеру бойынша іс-шаралар өтеді. Бұл туралы Қорғаныс министрлігі хабарлады.
2025 жылғы 2-6 маусым аралығында Қарулы күштердің дайындық жоспарына сәйкес еліміздің бірқатар өңірінде әскери бөлімдер мен құрамалардың жауынгерлік әзірлігін тексеру бойынша іс-шаралар өтеді.
Тактикалық-саптық сабақтар шеңберінде бөлімшелерді дабыл бойынша көтеру, әскери техника лектерінің тұрақты орналасқан жерінен оқу-жаттығу аудандарына, полигондарға және оқу орталықтарына қозғалысы жоспарланған.
Жаттығулар тек оқу мақсатында өткізіледі. Ондағы мақсат — жауынгерлік дайындық деңгейі мен жеке құрамның іс-қимыл үйлесімділігін арттыру, сондай-ақ бөлімшелерді басқарудағы командирлік дағдыларды жетілдіру.
Әскери техниканың қозғалысы барлық қауіпсіздік нормаларын сақтай отырып, қатаң бекітілген бағдарлар бойынша жүзеге асырылатын болады.
— Азаматтарды өткізілетін іс-шараларға түсіністікпен қарап, барынша сабырлы болуға және тексерілмеген ақпараттарды таратпауға шақырамыз, — делінген хабарламада.
Айта кетелік қазақстандық әскери қызметші АҚШ-та рекорд орнатқаны туралы жазған едік.
