Көшпенділер ойындары: америкалық ковбойлар көкпар ойнауға келе жатыр
АСТАНА. KAZINFORM – Америкалық ковбойлар командасы Қазақстанға V дүниежүзілік көшпенділер ойындарына қатысады. АҚШ құрамасының капитандары Вашингтоннан жолға шығар алдында Орталық Азия халықтарының спорттық дәстүрі жайлы агенттіктің меншікті тілшісімен тілдескен еді.
Көкпар және көкбөріден «USA Kokpar Team» америкалық командасының капитаны Лэдд Хоуэлл (Ladd Howell) жылқыға бала күнінен құмар екенін және АҚШ-тағы кәсіби родео-ковбойын жақсы көретінін айтты.
Көкпар мен көкбөрі туралы алғаш 2018 жылы достары YouTube-тан видео көрсеткен кезде білген.
«Досым маған бір видеоны көру керексің деді. Оны 5 минут қарадым да аузым ашылып қалды. Мен көрген ең керемет көрініс болды. Екі айдан соң Вайомингтегі достарымның бірі Қырғызстанда өткен ІІІ дүниежүзілік көшпенділер ойындарына қатысуға шақырды. Сөйтіп алғаш 2018 жылы ойнадым және маған ұнады. Бұл мәдениет пен спорт түрі ұнайды», - деп есіне алды Лэдд Хоуэлл.
АҚШ ұлттық құрамасы капитанының айтуынша, оларда мұндай ойын түрі жоқ, бірақ Америкада родео-ковбой кеңінен таралған. Онда балаларды ковбой болуға ерте жастан баулып, жаттығуға және жылқыларды күтіп баптауға үйретеді. Бұл жүздеген жылдар бойы әлемнің басқа төңірегінде ойналатын көкпар мен көкбөріге ұқсас.
«Бұл дәстүрлі ойынның қаншалықты керемет және ерекше екенін түсіну өте маңызды. Мәдениетімізді біріктіруге тырысамыз, жылқы көпір секілді, бәрімізді біріктіреді. Жылқы – баршаға ортақ халықаралық тіл секілді, сондықтан біз спорт пен мәдениетті ұнатамыз», - дейді ол.
Сонымен қатар капитан америкалық команданың спорттық сайыстарға дайындалудың кейбір сәттеріне тоқталды. Атап айтқанда, «USA Kokpar Team» ойындарға өз жылқыларын әкеле алмайды, аттарды қазақстандық тарап береді.
«Біз жылқыларды көруді асыға күтеміз. Олармен жарыстан бірер күн бұрын жаттығу жасап, қайсысы шабуылға шығады және қайсысы қорғаныста болатынын анықтаймыз», - деп бөлісті Л. Хоуэлл.
Оның айтуынша, команда мүшелері АҚШ-тың әртүрлі штатынан, сондықтан да бәрі бір жерге жиналып жаттығу өткізу қиын. Дегенмен әркім өз бетінше жылқымен дайындалған.
USA Kokpar Team-ның екінші капитаны Скотт Циммерман (Scott Zimmerman) команда сәтті ойын көрсетіп, алдағы ойында жеңістен үмітті.
«Біз Батыс Американың ковбой мәдениетімен бөлісе алатынымызға, сондай-ақ Орталық Азия елдерінің мәдениетін қабылдай алатынымызға сенімді болғымыз келеді. Біз Қазақстан туралы және бізге бұйырған осы бірегей мүмкіндік туралы айтқымыз келеді», - деді Скотт Циммерман.
Сондай-ақ Скотт Циммерман Америкада көкпар мен басқа ойындарды насихаттауға тырысып жүргенін айтты. Оның пікірінше, бұл мәдениет көпшілікке әсіресе Батыс Америка мәдениетіндегі ковбойларға ұнауы тиіс. Сол мақсатта яғни Орталық Азия мәдениеті мен оның этникалық спорт түрлерін жақсы түсіну үшін олар көшпенділер ойындарына қатысуды жалғастыруда. Көшпенділер ойындары қиын спорт түрлері болса да, америкалықтар жарысты асыға күтеді.
«Өзім қалаған спорт түрінде тезірек бақ сынағым, атқа отырып шапқым келеді», - дейді С. Циммерман.
Естеріңізге сала кетейік, V Дүниежүзілік көшпенділер ойындары Астана қаласында 8-13 қыркүйек аралығында өтеді.
Дүниежүзілік көшпенділер ойындарында 89 мемлекеттің спортшылары бақ сынайды.
Таяуда Мемлекет басшысы Қасым-Жомарт Тоқаев V Дүниежүзілік көшпенділер ойындарына дайындық жөнінде кеңес өткізді.
Айта кетсек, дүниежүзілік көшпенділер ойындарында тұңғыш рет барлық құрлықтың өкілі бақ сынайды.
