Қостанай облысында кәсіпкерді бопсалады деген күдікпен ұсталған адамнан 15 млн теңге табылды

АСТАНА. KAZINFORM – Қостанай облысының Қарабалық ауданында бопсалаушы блогер ұсталды, деп хабарлады бүгін Polisia.kz.

Полицияның хабарлауынша, әлеуметтік желілерде айыптаушы материалды жариялаймын деп бопсалап, кәсіпкерден аса ірі мөлшерде ақша талап еткен.

Өткізілген жедел іс-шаралар барысында блогерді прокуратурамен бірлесіп, Қарабалық ауданы полиция бөлімінің қызметкерлері ұстады. Тінту барысында одан 15 миллион теңге тәркіленді.

- Бопсалау фактісі бойынша сотқа дейінгі тергеп-тексеру басталды. Күдікті уақытша ұстау изоляторына қамалды, - делінген хабарламада.

Осыған дейін Қарағанда облысында адам бопсалап, кісі тонау, қарақшылықпен айналысқан қылмыстық топтың ұсталғанын хабарладық.