ҚР ІІМ: Қазақстанда туристерді ақпараттандыру және қорғау үшін сервистер іске қосылды

АСТАНА. KAZINFORM – Үкімет отырысында Ішкі істер министрі Ержан Сәденов Қазақстандағы туристердің қауіпсіздігін қамтамасыз ету шаралары туралы баяндады.

Елімізде туристердің келуі туралы онлайн-хабарлама ұйымдастырылды, сондай-ақ саяхатшыларға арналған мобильді қосымша іске қосылды. Ірі әуежайларда QR-кодтары бар «туристік карталар» беріледі, олар бірнеше тілде: көші-қон заңнамасының ережелері, шұғыл қызметтердің байланыстары, таксилер, байланыс операторлары, аймақ карталары және «102» қосымшасына сілтеме туралы ақпаратты қамтиды.

Ведомство басшысының айтуынша, өңірлерде қауіпсіздікті қамтамасыз ету үшін туристік аймақтарда, ұлттық саябақтарда және туристік орындарда шет тілдерін меңгерген туристік полиция бөлімшелері жұмыс істейді. Онда бейнебақылау жүйелері, дабыл түймелері орнатылған және заңсыз тасымалдардың жолын кесу үшін алдын алу шаралары жүргізілуде.

Айта кетейік, Олжас Бектенов туристерге келген сәттен бастап, кеткенге дейін қолайлы жағдай жасауды тапсырған еді.