«Мақтанайыншы»: Бағлан Әбдірайымов әуежайда ерлік жасаған адамның кім екенін айтты
АСТАНА. KAZINFORM – Алматы әуежайында қаскөйдің қолынан пышақты жұлып алып, ерлік жасаған ер адам туралы жаңа ақпарат пайда болды.
Әуежай қызметкерін қаскөйден аман алып қалған 52 жастағы Мұса Әбдірайым «Жігіттер» квартетінің мүшесі Бағлан Әбдірайымовтың ағасы болып шықты.
Әнші Instagram желісіндегі парақшасында ағасының ерлігі туралы жазба жариялады.
— Ағам Мұса Сайрамбайұлы 1973 жылы Түлкібас ауданы Күмісбастау ауылында дүниеге келген. Ол 9 баланың кенжесі. Кәсіби спортпен шұғылданған. Қазіргі таңда 5 баласы бар, ардақты әке. Бүгінгі ерлігін көріп, ел шулап жатыр. Намысты жігігіттің бәрі сондай ерлікке барар еді.
Ешкім батыр боламын, қаһарман боламын деген жоспармен жүрмесі анық. Дер кезінде дұрыс шешім қабылдадыңыз. Бұлай қаһарман боларын білгенде таңда бізді шығарып салғанда суретке түсіп алар едік. Ағамды мемлекеттік марапатқа да ұсыныпты, - деп жазды Бағлан Әбдірайымов.
Еске сала кетейік, бұған дейін Алматы әуежайында жолаушы қызметкердің шашынан тартып, көпшілік алдында пышақ кезенгенін жазған едік. Президент әуежайда қылмыскерді ұстауға көмектескен азаматты мемлекеттік наградаға ұсынуды тапсырды.
Сондай-ақ Алматыда әуежайындағы күдіктінің бұған дейін автобуста қызды ұрғаны белгілі болды. Ал, ерлігімен елді тәнті еткен Мұса Әбдірайым Kazinform тілшісіне қысқаша сұхбат берді.
