Қазақ журналистері ҰҚК арнайы полигонында күш-жігерін сынап көрді
АҚТАУ. KAZINFORM — Ұлттық қауіпсіздік комитеті ұйымдастырған шараға телеарналар мен ақпараттық сайт журналистері қатысуда. Баспасөз туры бұқаралық ақпарат құралдары қызметкерлерінің кәсіби мерекесі қарсаңында өтіп жатыр.
Журналистер баспасөз турының бірінші күні Ұлттық қауіпсіздік комитетінің Маңғыстау облысы бойынша шекара қызметі департаментінің жағалау күзеті бірінші дивизионының жұмысымен танысты.
Содан соң арнайы мақсаттағы қызметтің оқу-жаттығу полигонына барды.
Ұлттық қауіпсіздік комитеті баспасөз қызметі бастығының орынбасары Айгүл Айнабекованың айтуынша, Маңғыстауда баспасөз туры алғаш рет өткізіліп жатыр.
Бұған дейін Астана мен Түркістан облысында ұйымдастырылған.
— Комитет бұқаралық ақпарат құралдарымен тығыз қарым-қатынас жасау үшін болашақта барлық өңірде осындай іс-шараларды өткізуді жоспарлап отыр. Баспасөз туры аясында журналистерге террорлық шабуыл мен дағдарыс жайлы ақпарат жариялаудың ерекшеліктері айтылды, — дейді Айгүл Айнабекова.
БАҚ өкілдеріне арнайы мақсаттағы қызметтің оқу-жаттығу полигонында ҰҚК-нің арнаулы бөлімшелерінің қарумен жабдықталуы, заманауи қару-жарақтары көрсетілді.
Одан кейін барокамерада 10 метр тереңдікке дейін құрғақ сүңгу ұйымдастырылып, әртүрлі қару түрлерінен практикалық атыс болды.
Ал, жағалау күзетінің бірінші дивизионында теңіз шекарашылары кемеде өрт кезінде жүргізілетін оқу-жаттығуларын көрсетті.
БАҚ өкілдері шекаралық экипаждардың төтенше жағдайларларға дайындығына куә болды.
