Масқара жағдай, саботаж деуге болады: Президент жолдардың сапасына шүйлікті
АСТАНА. KAZINFORM – Мемлекет басшысы Қасым-Жомарт Тоқаев қала көшелерімен қатар, елді мекендерден тыс жолдардың сапасына да көңіл бөлуді тапсырды. Президент бұл мәселені Қазақстанның «ең осал тұстарының бірі» деп атады.
Президент саябағында өткен экологиялық акцияда Мемлекет басшысы Үкімет пен әкімдер қала және ел ішіндегі, яғни ірі немесе шағын қалалардан тысқары жолдардың сапасына баса назар аударуы керектігін ескертті.
– Бұл – біздің ең осал тұсымыз, оны мойындаған жөн. Мұны ешкім шеше алмады немесе шешуге құлық танытпады. Масқара жағдай. Оны саботаж деуге болады. Заң аясында қатаң шаралар қолданамыз, – деді Қасым-Жомарт Тоқаев.
Оның айтуынша, еліміз цифрландыру мен жасанды интеллектіні дамыту жолында нық қадам басты. Табыстары көзге көрініп тұр, оны тұрғындар күнделікті өмірде пайдаланып та жүр.
– Бұған дейін атап өткенімдей, елордадағы Урбанистика орталығының тәжірибесін таратудың маңызы зор. Олар қала кеңістігін дамытуда заманауи тәсілдерді сәтті қолданып келеді. Орталық елорданың бірыңғай сәулет стилін айқындайтын үлгілер мен дизайн-код әзірлейді. Мұнда шетелдік тәжірибе де пайдаланылады. Барлық өңірде осы іспетті орталықтардың жұмысын уақыт оздырмай жолға қою қажет. Олар шаһарлардың біртұтас әрі үйлесімді келбетін қалыптастыруға тиіс, – деп тапсырма берді Мемлекет басшысы.
Бұған дейін Қ. Тоқаев еліміздің әрбір азаматы бүгін де, ертең де «Таза Қазақстанда» жайлы өмір сүруі керектігін айтқан еді.
Жыл басынан бері «Таза Қазақстан» акциясына 7 млн адам қатысып, 130 мың гектар жер тазартылған.
Президент «Таза Қазақстанды» жаңа деңгейге көтеріп, ұлттық тазалық стандартын әзірлеуді ұсынды.
