«Қожа. Жаңа саяхат» фильмі көрерменге жол тартады
АСТАНА. KAZINFORM — Әйгілі «Менің атым Қожа» фильмінің жалғасы, заманауи форматта 13 наурыздан бастап еліміздің барлық кинотеатрында көрсетіле бастайды. Фильм Алматы облысының Кеген ауданы Жалаңаш, Саты ауылдарында түсірілді.
— Классикалық туындыны қайта жандыру идеясы, «Қалам» мектебінен басталды, бұл балаларды математикаға баулитын мектеп. Ойлана келе, балаларға Қожа ұнайды деп, бір минуттық креативті видео түсіріп, әлеуметтік желіге жүктедік, халықтың сағынышы бірден байқалды. Содан бұл фильмді қайта жандандырып, түсірмеске деген ой келіп, нартәуекел еттік. Басы қойыңдар, қате идея дегендер болды, бұл үлкен жауапкершілік, сол деңгейде түсіре алмасаңдар халықтың сынына қаласыңдар деп айтты, дегенмен шешінген судан тайынбас дегендей фильмді түсіруге кірісіп кеттік, — деді «Қожа Жаңа саяхат» фильмінің режиссері Қуат Ибрагимов тұсаукесер рәсімінде.
Оның айтуынша, фильмнің жаңа нұсқасының сценариінде өзгеріс бар. Бердібек Соқпақбаевтың шығармасына толық негізделген.
— Мысалы, алғашқы фильмде Қожа ғарышкер болуды армандаса, біздің фильмде жазушы болғысы келеді және сол арманы орындалады. Себебі кітапта солай жазылған. Фильмді түсіруге 1 айдан аса уақыт кетті. Актерлік құрамға келсек, әртістерді Қазақстан бойынша іздеп, кастинг өткіздік және іріктеу ұзаққа созылды. Кейіпкерлердің 70 пайызын әлеуметтік желіден таптық десем болады, кәсіби әртістер де бар. Бірақ, Қожаның рөліне талас болған жоқ, бізде бір ғана кандидат болды, жалпы фильмді түсіру идеясы сол Қожаға ұқсайтын баланы көргеннен кейін туындады, бүгінгінің Қожасын көрсету керек болды. Қожаны сомдаған баланың есімі Айқын, ол ауылдың қарапайым баласы, ешқандай актер болуды армандамаған. Біздің Қожаның тумасы алғашқы фильмдегі Қожаға ұқсас, — дейді ол.
Фильмнің жабық көрсетіліміне жиналған жұрттың қарасы көп болды. Көрермендер фильмде Қожаның рөлін сомдаған Айқын Елубаймен жарыса суретке түсті. Арасында уақыт тауып жас талантпен тілдескен едік.
15 жасар Айқын Елубай Шымкенттің іргесіндегі Ақбұлақ ауылының тумасы қазір 9 сыныпта оқып жатыр.
— Менің түрім Қожаға ұқсағанымен әртістік білік-білімім болмады, сондықтан бірінші кастингтен өте алмадым, екінші рет бақ сынау үшін 4 ай дайындалдым. Бірақ, фильмде баяғы Қожаның бейнесін сомдаған жоқпын, өзімді ойнадым, себебі менің түр-әлпетім, жүріс-тұрысым Нұрлан Сегізбаев атама келеді. «Менің атым Қожа» фильмін алғаш осыдан 2 жыл бұрын көрдім. Жалпы өзім көкпар шабамын, трактор айдаймын, — дейді жас әртіс.
Жасөспірімнің Қожаға ұқсайтынын фильм түсіріліміне дейін біраз адам айтқан.
— Ағам мені видеоға түсіріп біз Қожаны таптық деп желіге салды, содан кейін желіде таныла бастадым. Осы фильмге кастинг директоры тартты, сонымен қатар Kalifarniya деген әншінің клипіне түстім. Биыл 9 сыныпты бітірген соң, Алматы қаласына әртіс мамандығына оқуға түссем деп жоспарлап жүрмін, — дейді ол.
Жас әртістен мектептегі сабақ үлгерімі туралы сұраған едік, қиналған түр танытып «орташа» деп қысқа қайырды.
Айқын Елубайға «Қожа. Жаңа саяхат» фильмінен бөлек, киноға түсуге біраз ұсыныс түсіпті, бірақ жасөспірім алдымен оқуым керек деп отыр.
— Ұсыныс өте көп, мені «Жошы хан» фильміне түсуге де шақырды, мен болашақта актерлік жолды таңдаймын деп отырмын, сондықтан маған алдымен білім алу қажет, — дейді ол.
Жасөспірім өнерден бөлек, спортқа да жақын, 3 жыл бокс және 7 жыл күреспен әуестеніпті және бос уақытында атқа мінгенді ұнатады.
Еске сала кетсек, 2022 жылы елордада «Менің атым Қожа» фильмінің кейіпкеріне ескерткіш орнатылды.
Сондай-ақ былтыр қарашада Париждегі ЮНЕСКО штаб-пәтерінде «Менің атым Қожа» фильмінің көрсетілімі өтті.
