Министрлік Nazarbayev University бұрынғы басшысын сотқа бере ме – Саясат Нұрбектің жауабы
АСТАНА. KAZINFORM – Министрлік Назарбаев Университетінің бұрынғы басшысы Шигео Катсуға қарсы шағым түсірмейді және Назарбаев Университетінің арызына араласпайды. Бұл туралы ҚР Ғылым және жоғары білім министрі Саясат Нұрбек айтты.
Үкіметте министрге БАҚ өкілі Назарбаев Университетінің бұрынғы басшысы Шигео Катсуға қарсы арыз дайындап жатқанын айта келе, «Ғылым және жоғары білім министрлігі де оны сотқа бере ме?» деп сұрады.
— Біріншіден, Шигео Катсудың сол кездегі мәлімдемесі шындыққа сай келмейді. Екіншіден, әлбетте, өкінішке қарай бұл еліміздің репутациясына нұқсан келтіреді. Үшіншіден, ол мәлімдеме салмақты басылымдарда емес, сонша бір сенімге ие емес ақпарат агрегаторларында жарияланды. Себебі салмақты басылымдардың бәрі де фактчекиг жасайтынын білеміз. Сол себепті НУ-дың бұрынғы басшысын сотқа беруі бұл сол ЖОО-ның жеке шаруасы, өйткені олар автономды оқу орыны. Олардың жұмысы жеке заңмен реттеледі. Ал біздің министрлік Катсу мырзаны сотқа бергелі жатқан жоқ. Тиісті көмекті керек болған жағдайда университетке бере аламыз. Себебі бұл жерде зиян Назарбаев Университетіне тиіп жатыр, – деді ол.
Сондай-ақ, журналист қазір аталған университетке қатысты түрлі арандатушылықтардың неге көбейіп кеткенін сұрады. Саясат Нұрбек расында да, Назарбаев Университетіне ақпараттық шабуыл жасалып жатқанын айтты.
— Біздің болжам бойынша, оны Катсу мырзаның тобы ұйымдастырып отыр. Себебі ол кетсе де, артында өзі сенетін көп адам қалды. Соғыста барлық әдіс жақсы дейді ғой. Ішкі арандатулар жүріп жатыр. Байқасаңыздар, мұндай жайттар Катсу мырзаның белсенділігінен кейін пайда бола бастады. Біз мұны еңсереміз деп ойлаймын. Үкімет те, министрлік те Назарбаев Университетінің бұл шаруасына араласа алмайды, – деді ол.
Еске сала кетейік, бұған дейін Назарбаев университетінің бұрынғы ректоры Шигео Катсу сұхбат беріп, университеттің академиялық еркіндігі мен институционалдық дербестігіне қауіп төніп тұрғанын мәлім еткен еді.
Оның айтуынша, бұрынғы президент ашқан оқу орындары мен ұйымдар 2022 жылдан бастап биліктің қысымына ұшырай бастаған.
Айта кетейік, Шигео Катсу Kazinform тілшісіне Назарбаев Университетінің басшылығынан не себепті кетіп жатқанын айтқан болатын.
