Мұхитта жасалған қылмыс: Қытайда капитан кісі қолынан қаза тапты

АСТАНА. KAZINFORM – Шандунь провинциясындағы Вэйхай теңіз полициясы «Үнді мұхитының ашық айдынына сапар шеккен балықшы кемесінің капитаны экипаж мүшесінің қолынан қаза тапты» деген ақпаратты растады. 

Вэйхай теңіз полициясының мәлімдемесінде күдіктінің кемеде қамауға алынғаны айтылды. 

Нақтырақ айтқанда, 11 наурыз күні Жунчэн қаласына тиесілі балықшылар кемесінде қанды қылмыс болып, бір адам қаза тапқан. Тәртіп сақшылары 12 наурыз күні осы оқиға бойынша іс қозғаған, күдікті қамалып, кеме сапардан қайтып келеді. Қылмыстық іс заң аясында тергеліп жатыр. 

Қылмыстық оқиға туралы ең алғаш капитанның қызы 20 наурыз күні әлеуметтік желіде жазба жариялап, дабыл қаққан болатын. Оның айтуынша, әкесі былтыр маусым айында балықшы кемесімен алыс сапарға аттанған. Жоспар бойынша биыл маусым айында оралуға тиіс еді.  Алайда 12 наурыз күні әкесінің кісі қолынан жазым болғаны туралы суық хабар жеткен. 

— 11 наурыз күні таңғы 7:30 шамасында Үнді мұхитының ашық айдынында қандықол әкемді өлтіріп, денесін теңізге лақтырып жіберген. Қанішерді экипаж мүшелері ұстап отыр, ал кеме елге қайту туралы бұйрық алған. Бұл сапар шамамен 25 күнге созылады, сондықтан кеме сәуір айында елге жетуі тиіс, - деп жазды ол.

Ол The Paper ақпараттық порталына берген сұхбатында қылмысқа қатысты кеменің «Лу Жун Юань Юй» префиксімен тіркелгенін айтқан. Бұл дерек осыдан он неше жыл бұрын Қытайды дүр сілкіндірген тағы бір атышулы қылмысты интернет қолданушыларының есіне қайта түсіріп, қызу пікірталас тудырды.

2011 жылы «Лу Жун Юй 2682» атты кеме Тынық мұхитының ашық айдынына шыққан сапарында экипаж мүшелері арасында қақтығыс туады. Салдарынан 16 адам қаза тауып, 6 адам із-түссіз жоғалып кетеді. Жағаға тірі жеткен 11 адамның барлығы сотталып, 5-еуі өлім жазасына кесілген болатын.

Еске сала кетейік, Солтүстік Кореяның 20 теңізшісі Қытай аумағында кеме апатынан қаза тапқанын жазған едік.