Мьянмада 7,9 балдық жер сілкінісі тіркелді

АСТАНА. KAZINFORM – Қытай Сейсмикалық стансалар желісінің ресми мәліметіне сәйкес, 28 наурыз күні Бейжің уақытымен 14:20-да (Астана уақытымен 11:20) Мьянма аумағында (солтүстік ендік 21.85°, шығыс бойлық 95.95°) магнитудасы 7,9 балдық жер сілкінісі болды. Жерасты дүмпулерінің тереңдігі – 30 км.

Синьхуа агенттігінің Мьянмағы тілшісінің жазуынша, елдің ең ірі қаласы – Янгонда жер сілкінісі қатты сезілген. Сондай-ақ, сілкініс дүмпуі Таиланд астанасы Бангкок пен Лаос астанасы Вьентьянда да анық байқалған.

Қазірше зардап шеккендер мен материалдық шығындар туралы ресми ақпарат жоқ.

Chinanews агенттігінің хабарлауынша, Қытайдың Юньнань провинциясындағы Баошань, Сишуанбаньна-Дай автономиялық облысы, Пуэр және Куньмин қалаларының тұрғындары да күшті жер сілкінісін анық сезген.

Айта кетейік, бүгін түнде Алматыдан 323 шақырым жерде жер сілкінісі тіркелді.