Никол Пашинян Қазақстан президентіне көңіл айту жеделхатын жолдады

Армения премьер-министрі Никол Пашинян Қарағанды облысындағы Костенко шахтасындағы апаттан болған адам шығынына байланысты Қазақстан Президенті Қасым-Жомарт Тоқаевқа көңіл айту жеделхатын жолдады, деп хабарлайды Kazinform Арменпресс агенттігіне сілтеме жасап.

«Құрметті Қасым-Жомарт Кемелұлы, Қарағанды облысындағы Костенко атындағы шахтада кеншілердің қаза болуына әкеп соққан апат туралы хабарды үлкен күйінішпен қабылдадым. Армян халқының және жеке өз атымнан қайтыс болғандардың туыстары мен жақындарына көңіл айтамын, жанашырлық пен қолдауымды білдіремін. Оларға шыдамдылық, күш пен қажыр-қайрат тілеймін», - деп жазылған жеделхатта.

Еске салайық, бүгін түнде Қарағанды облысындағы Костенко атындағы шахтада өрт болды. Сағат 17.33-тегі мәлімет бойынша 33 кеншінің денесі табылды,13 адам іздестіріліп жатыр. 20 жұмысшы ауруханаға жеткізілді.

"АрселорМиттал Теміртау" АҚ-ға тиесілі 8 шахтаның жұмысы уақытша тоқтатылды.

Кешқұрым брифинг өткізген Төтенше жағдайлар министрі Сырым Шәріпханов жер астында қалған 13 кеншіні тірі табуға үміт өте аз екенін мәлім етті.

Мерт болған кеншілердің жеке басын анықтау қиынға түсіп жатқаны айтылуда.

Президент Қ.Тоқаев 29 қазанды жалпыұлттық аза тұту күні етіп жариялайтын Өкімге қол қойды.

Мемлекет басшысы Қасым-Жомарт Тоқаев Үкіметке «АрселорМитталТеміртау» компаниясымен инвестициялық ынтымақтастықты тоқтату туралы тапсырма берді. Кейін Үкіметтің баспасөз қызметі «АрселорМиттал Теміртау» АҚ-ның меншік құқығын ҚР меншігіне қайтару туралы келісімшарттың аяқталуға жақын екенін мәлім етті.

ҚР Үкіметі апаттан қаза тапқандардың отбасыларына қандай көмек көрсетілетінін жариялады.

Апатқа байланысты Ресей, Беларусь, Өзбекстан, Қырғызстан, Франция президенттері мен Түркия Сыртқы істер министрлігі көңіл айтты.Президент Қасым-Жомарт Тоқаев Қарағанды облысындағы қайғылы оқиғаға орай көңіл айтқан барлық шет мемлекеттер басшылары мен қазақстандықтарға ризашылығын білдірді.

Kazinform «АрселорМитталТеміртау» тарихында қандай апаттар болғаны туралы шолу ұсынған болатын.