ОҚО-да қалалық оқушылар ауылға барып, ондағы тұрғындарға көмектесті

ШЫМКЕНТ. ҚазАқпарат - Оңтүстік Қазақстан облыстық білім басқармасы Елбасы мақаласын қолдау мақсатында тың жобаны қолға алды. «Бір апта ауылда» деп аталатын жоба асында шымкенттік оқушылар Бәйдібек ауданына сапар шегіп, ауылдың тыныс тыршілігімен танысуда. Сонымен қатар киелі жерлерді аралап, ауылдың тірлігіне қарайласып жатыр, деп хабарлайды «ҚазАқпарат ХАА тілшісі.

Алғашқы жоба желісімен 15 оқушы ауылға аттанды. Олар алдымен, Бәйдібек ауданының орталығы Шаян ауылындағы Аппақ ишан мешіт - медресесімен және осында орналасқан мұражаймен танысты. Бұдан кейін балалар Көктерек ауылындағы «Береке» шаруа қожалығына келіп, нағыз ауыл тіршілігіне араласты. Қой бақты, ағаш жарып, от жақты. Шаршау басарға балық аулады. Ашыққанда ауылдың қою айранынан дәм татты.

«Өте қызық сапар болып жатыр. Ауыл тіршілігінің оңай емес екендігіне көзіміз жетіп келеді. Ағаш жардық, от жақтық, шәй қайнаттық. Қиын болса да маған ұнады»,- дейді оқушылардың бірі Балғынбек Кәдірбек.

Балалардың кезекті сапары әйгілі Ақмешіт үңгіріне саяхаттаумен жалғасты. Табиғаттың тылсым сырын ішіне бүккен ғажайып мекен кімді де болсын, керемет әсерге бөлейтіні анық. Жол бойы осындай көріністерді тамашалап барған балалар тау баурайындағы «Болашақ» лагеріне орналасты. Олар осы лагерьде бір апта болып, ауылдың тіршілігімен танысатын болады.

«Сапардың мақсаты - Елбасы мақаласындағы «Рухани жаңғыру» бағдарламасын жүзеге асыру, оны балаларға түсіндіру және түсіндіріп қана қоймай, қала балаларына ауыл тіршілігін көрсетіп, еңбекке бейімдеу болды»,- дейді Облыстық білім басқармасының бөлім басшысы Зүбайра Алтаева.