ОҚО: Ордабасы ауданының әкімі жергілікті полиция қызметінің жұмысын саралады
Алдымен мал ұрлығының алдын алу, жолын кесу бойынша атқарылған жұмыс барысы тыңдалды. Жергілікті полиция қызметі басшысының міндетін атқарушы, полиция майоры А.Ерсариев бұл мәселе бойынша түнгі мезгілдегі рейд шараларының тұрақты түрде өткізілетінін, аудандағы мал базарларына түсетін төрт түліктің құжаты тиянақты тексеруден өтетінін мәлімдеді.
Алмасбек Кеңесбекұлы көпшілік орындарына орнатылатын бейнебақылау камераларының қылмысты ашуға тигізер көмегі мол екеніне ерекше тоқталып, Ішкі істер бөлімі қызметкерлерін оның мүмкіндіктерін барынша пайдалануға шақырды. "Кейде мән бере бермейтін ұсақ-түйектің өзі үлкен қылмыстың ашылуына әкеледі. Мал ұрлығы да тосыннан болатын тірлік емес. Күнделікті бейнежазбаларға мұқият болғандарыңыз жөн", деді аудан басшысы өз сөзінде. Аудандық ішкі істер бөлімі басшысының орынбасары, полиция капитаны Н.Аташев осы жылы аудандағы 12 бейнекамераның көмегімен 885 құқық бұзушылық жөнінде әкімшілік хаттама түзілгенін тілге тиек етті. Жиналыс барысында қаралған мәселелерге орай, Алмасбек Кеңесбекұлы бірқатар тапсырмалар беріп, орындалуын қадағалауды тиісті салаға жетекшілік ететін орынбасарына жүктеді. Сонымен қатар, тапсырмалардың орындалуы жіті бақылауда болатынын ескертті.