Оқушылардың улануы: Дүкен иесінде өнім сертификаты болмады

АҚТӨБЕ. KAZINFORM – Ақтөбеде эпидемиологтер тексеру жүргізіп жатыр. Дүкен иесінде арнайы құжаты болмады, өнімде техникалық регламенттерге сәйкес таңбалары жоқ.

Ақтөбе облыстық санитариялық-эпидемологиялық бақылау департаментіне хабарлама 18 ақпан күні сағат 17:28–де түскен. Эпидемиологтерге төтенше жағдайлар қызметінің кезекші бөлімі хабар берді. 

— Сол күні 4 «Б» сынып оқушысының Қобда ауданында орналасқан дүкеннен белгісіз өнімді сатып алғаны анықталды. Бастауыш сынып оқушылары 18 ақпан күні мектеп асханасында тамақтанбаған, яғни бұл оқиғаның білім ордасындағы ас бөлмесіне қатысы жоқ. Департаменттің бөлім мамандары Қобда ауданында орналасқан дүкенге тергеп-тексеру жүргізді. Аталған өнімдерді растайтын құжаттары ұсынылмады, техникалық регламенттерге сәйкес таңбалары жоқ. Мұндай жағдай тұрғындар арасында қайталанбас үшін түсіндірме жұмысы күшейтіліп жатыр. Облыста 45 сауда орны бақылау мақсатында қаралды. Оның ішінде 2 сауда орнынан аталған өнімнің сатылымда болғаны анықталып, сатып алынды. Зертханалық зерттеу жүргізуге жолданды. Бұл бағытта жұмыстар жалғасады, — деп хабарлады Ақтөбе облыстық санитариялық-эпидемологиялық бақылау департаментінің баспасөз қызметі.

Еске салсақ, кеше Ақтөбе облысы Қобда ауданында оқушылардың тәттіден уланғаны айтылды. Алғашқы күні ауруханаға 23 бала түсті. Бәрі бір сыныптың оқушысы.

Қобыланды батыр атындағы орта мектептегі улану дерегінен соң ауруханаға бір емес, бірнеше дәрігер жіберілген. Полиция тергеу жүргізіп жатыр.