Оқушылардың улануы: Эпидемиологтер өнімді бірнеше дүкеннен сатып алып, зерттеп жатыр

АҚТӨБЕ. KAZINFORM – Ақтөбеде эпидемиологтер оқушылар уланған өнімді тағы бірнеше дүкеннен сатып алды. Қазір зерттеу жүргізіп жатыр.

Ақтөбе облыстық санитариялық-эпидемиологиялық бақылау департаментінің басшысы Райхан Қойшанованың айтуынша, бүгінде 219 дүкенге мониторинг жасалды. Оқушылар уланған өнім 3 сауда орнынан алынды. 

— Қазір микробиологиялық және санитарлы-химиялық зерттеу жүргізіліп жатыр. Нәтижесі бойынша қосымша хабарланады. Оқушылар 19-20 ақпан күндері үйлеріне шығарылды. Оларға тыныс алу жолдары арқылы улану диагнозы қойылды, — деді Ақтөбе облыстық санитариялық-эпидемиологиялық бақылау департаментінің басшысы Райхан Қойшанова. 

Ақтөбе облыстық ПД баспасөз қызметінің хабарлауынша, Қылмыстық кодекстің «Қауiпсiздiк талаптарына сай келмейтін тауарларды шығару немесе сату, жұмыстарды орындау не қызметтер көрсету» бабы бойынша іс қозғалды. Санция бойынша белгiлi бiр лауазымдарды атқару немесе белгiлi бiр қызметпен айналысу құқығынан 3 жылға дейiнгi мерзiмге айыра отырып, 5 мың АЕК дейiнгi мөлшерде айыппұл салынады, болмаса 1200 сағатқа дейінгі мерзімге қоғамдық жұмыстарға тартылады. Тіпті 5 жылға дейiнгi мерзiмге бас бостандығын шектеу, бас бостандығынан айыру жазасы қарастырылған.

Еске салсақ, 18 ақпан күні оқушылар уланды. 

Балалардың бірі дүкеннен қытайша жазылған өнімді сатып алып, сынып ішінде бөліп бергені белгілі болды. Олардың көзі жасаурап, денесіне бөртпе шыққан.

Тексеру кезінде дүкен иесінде өнім сертификаты болмағаны анықталды.

Ал кеше балалардың бәрі ауруханадан шықты.