Олжас Бектенов: тарихи құжаттарды цифрлық архивте сақтап, қолжетімді ету керек

АСТАНА. KAZINFORM – «е-Архив» деректері «Батырларға тағзым» онлайн-платформасына орналастырылады. Бұл туралы Премьер-министр Олжас Бектенов мәлім етті.

- «е-Архив» ақпараттық жүйесін одан әрі дамытуға баса назар аударған жөн. Ол құжаттардың сақталуын қамтамасыз етіп, архив жұмысының тиімділігін арттырады. «е-Архив» деректерін «Батырларға тағзым» онлайн-платформасымен үйлестіру жұмыстарын аяқтау қажет. Қолымызда бар тарихи құжаттардың бәрін ұлттық цифрлық архив базасында сақтап, қолжетімді етуіміз керек, - деді Олжас Бектенов Үкімет отырысында.

Одан әрі Үкімет басшысы кітапхана саласын жетілдіру керектігін айтты.

- «Е-кітапхана» жүйесінде қазірдің өзінде классикадан бастап заманауи басылымдарға дейінгі кітаптарды оқуға мүмкіндік бар. Алдағы уақытта олардың санын көбейтіп, қолданыстағы платформалармен белсенді жұмыс істеу керек. Сонымен қатар қазір аудио-кітаптар өте танымал. Қазақстандық авторлардың аудио-кітаптарын жасап, оларды түрлі платформаларға, оның ішінде әртүрлі тілдерде де орналастыру қажет. Осылайша әдебиетімізді елімізде ғана емес, одан тыс жерлерде де насихаттай аламыз, - дейді ол.

Бұған дейін Олжас Бектенов фильмнен түсетін пайданың көбі кинотеатр иелерінде қалып жатқанын айтты. 

Айта кетсек, былтыр отандық кино өндірісі 58 пайызға артты. Премьер-министр кино туындылардың санын көбейтіп, тек пайда түсіруді ғана мақсат етпей, фильмдердің сапасына баса назар аудару керектігін баса айтты.