Омбылық қазақ қызы Салтанат Меденова бокстан әлем чемпионы болды

АСТАНА. KAZINFORM – Сербияның Ниш қаласында әйелдер арасында бокстан әлем чемпионатында омбылық қазақ қызы, Ресей құрамасының мүшесі Салтанат Меденова жеңімпаз атанды.

С.Меденова 81 келіге дейінгі салмақта түркиялық Исильдар Бусрамен шеберлік байқасты.
Бірінші раундта бес төрешінің үшеуі Салтанат басым деп тапты.

Екінші кезеңде С.Меденова алға ұмтылып, жұдырық сілтеуді үстемелетті – 4:1. Қорытынды есеп те – 4:1.

Осылайша, С.Меденова әлем чемпионатындағы алғашқы алтынына қол жеткізді. 
Бұл салмақтағы қазақстандық Гүлсая Ержан 1/8 финалда-ақ жарыс жолынан шығып қалды.
Салтанат осыған дейін Ресей чемпионатында үш рет топ жарып, өткен жылы БРИКС ойындарында да үздік шыққан еді.

Еске сала кетейік, бұдан бұрын қазақ қызының үш мәрте Ресей чемпионы атанғанын жазған болатынбыз.

Сондай-ақ Назым Қызайбай қазақстандық боксшылардан алғаш рет үш дүркін әлем чемпионы атанды.

Алуа Балқыбекова Қазақстан қоржынына екінші алтынды салды.