Оңтүстік Кореяның оңтүстік-шығысында орман өрті толық сөндірілді
СЕУЛ. KAZINFORM – Оңтүстік Корея билігі 21 наурыздан бері өршіп тұрған орман өртін толықтай ауыздықтады. Бұл туралы елдің Ішкі істер және қауіпсіздік министрлігі хабарлады, деп жазады ТАСС.
Ішкі істер министрінің міндетін атқарушы Ко Ки Донның басшылығымен Кёнсан-Пукто, Кёнсан-Намдо провинцияларында және Ульсан қаласында (мұнда бұған дейін төтенше жағдай режимі енгізілген) өткен кеңесте өртке қарсы шаралар талқыланған.
— Бүгін жергілікті уақытпен 13:00–де (Астана уақытымен 09:00) Кёнсан-Намдо провинциясының Санчхон уезіндегі басты өрт ошағы толық сөндірілді. Бұл жерде өрт 21 наурызда басталған. Осылайша, барлығы 11 өрт ошағының жалыны өшірілді, — делінген министрлік хабарында.
Жалын 48 мың гектар аумақты шарпыған, бұл — жергілікті БАҚ-тың бағалауы бойынша, шамамен Сеул аумағының 80%-ына тең. Ко Ки Дон бұл өртті ел тарихындағы ең жойқын апаттардың бірі деп атады, өйткені ол адам шығыны мен материалдық залал тұрғысынан аса ауыр болды.
Соңғы мәліметтерге сәйкес, 30 адам қаза тауып, 45 адам жарақат алған. Тілсіз жау 30 мәдени мұра нысанын жойып жіберген, деп хабарлайды Yonhap агенттігі.
30 наурызда Оңтүстік Кореяның Орман қызметі Кёнсан-Пукто провинциясындағы өрттің толық сөндірілгенін мәлімдеген. Алайда, сенбі күні түнде жалын қайта өршіген. Сонымен қатар, Оңтүстік Корея полициясы 56 жастағы жергілікті тұрғынға қатысты тергеу бастады. Ол 22 наурызда Ыйсон уезіндегі отбасы зиратында ата-бабаларды еске алу рәсімі кезінде өрттің тұтануына себеп болды деген күдікке ілініп отыр.
Айта кетейік, бұған дейін Оңтүстік Кореяның оңтүстік-шығыс өңірін шарпыған орман өрті салдарынан 18 адам қаза тапқанын жазған едік. Сондай-ақ, өрт сөндіру тікұшағының апатқа ұшырауы салдарынан ұшқыш көз жұмған.
Президент Қасым-Жомарт Тоқаев Корея халқына көңіл айтты.
