Оңтүстік Суданда тырысқақ дертінен 73 адам көз жұмды

АСТАНА. KAZINFORM – Оңтүстік Суданның солтүстігіндегі Юнити штатында өткен аптада тырысқақ дерті 73 адамның өмірін қиды. Бұл туралы Tamazuj радиостанциясы аймақтық үкіметке сілтеме жасап хабарлады, деп жазады Report.

Мәліметке сәйкес, 3,7 мың жергілікті тұрғын ауру жұқтырған. Өлім саны айтарлықтай көп болуы мүмкін, 73 өлім тек ауруханаларда ғана тіркелді, делінген хабарда.

Юнити штатындағы босқындар лагерлері эпидемия ошағына айналған, БҰҰ мәліметі бойынша ол жерде адамдардың өмір сүруі үшін қарапайым санитарлық жағдайлар жасалмаған.

«Шекарасыз дәрігерлер» гуманитарлық ұйымы Оңтүстік Суданның солтүстік аймақтарында жұмыс жүргізуде. Бұл аймақ тырысқақ дертінің белең алуымен қатар гуманитарлық апаттың құрсауында қалған.

Айта кетейік, БҰҰ Гуманитарлық мәселелерлі үйлестіру басқармасының (ГМҮБ) мәліметінше, Оңтүстік Судандағы алапат су тасқыны 1,4 млн адамның өміріне зардабын тигізген, 379 мың адам үйін тастап кеткен.

Бұған дейін Суданда 130 әйел жыныстық зорлықтан жалтару үшін үшін өз-өзіне қол жұмсағаны туралы жазған едік.