ОПЕК+ келісімінің сақталуын қамтамасыз етуге ниеттіміз — Сәтқалиев
АСТАНА. KAZINFORM — Энергетика министрі Алмасадам Сәтқалиев ОПЕК+ шеңберінде Қазақстан алдына қойылған міндеттемелерді толық орындауға ниетті.
— Серіктестерімізбен конструктивті диалог жүргізіп жатырмыз және олардың тарапынан түсіністік бар екеніне көзіміз жетіп отыр. Мұнай өндіру көлемін қысқартуға және ОПЕК+ шеңберінде барлық келісімнің сақталуын қамтамасыз етуге мүмкіндік беретін кешенді шаралар әзірлеудеміз. Қазақстан міндеттемелерді орындау үшін барлық қажетті шараны қабылдауға ниетті, — деді Алмасадам Сәтқалиев ведомствода өткен баспасөз мәслихатында.
Бұған дейін хабарлағанымыздай Қазақстан ОПЕК+ келісімі шеңберінде мұнай өндірісін қысқартады.
Еске сала кетсек, былтыр жыл соңында ОПЕК+ елдері мұнай өндіруді 2026 жылға дейін қысқартуға келіскен еді.
Биыл ақпанда белгілі болғандай, ОПЕК+ елдері сәуірден мұнай өндіру көлемін арттыруға уағдаласты.
Бірер күн бұрын белгілі болғандай Қазақстан ОПЕК+ келісімі шеңберінде өз міндеттемелеріне адалдығын растады.
