Ораза айт күніне орай ақылы жолдар тегін болады – шетелдегі қазақ баспасөзі
Kazinform ХАА шетелдегі қазақ тілінде тарайтын ақпарат көздеріне апталық шолуын ұсынады.
Өзбекстаннан Қазақстанға 1,2 млн АҚШ долларын жасырын алып өтпек болғандар ұсталды – ӨзА
Өзбекстанның Мемлекеттік қауіпсіздік қызметі мен кеден органдары бірлесіп жүргізген жедел іс-шара барысында Ташкент облысы Ташкент ауданы аумағындағы «Науаи» шекара-кеден бекетінде көрші мемлекетке қарай бет алған Lacetti көлігі тоқтатылып, куәгерлердің қатысуымен тексерілген.
Көлік жолаушысы ретінде бара жатқан, Ташкент ауданында тұратын, 1978 жылы туған азаматтың қолындағы пакетінен 874 мың АҚШ доллары табылған. Бұл туралы осы аптада «ӨзА» ақпарат агенттігі хабарлаған болатын.
Хабарламада айтылуынша, тексеру нәтижесінде, азамат бұл ірі көлемдегі валютаны декларациясыз, кедендік бақылаудан жасырып, Қазақстанға алып өтпек болғаны анықталды.
Сондай-ақ жедел шара барысында тергеу жалғасып, Ташкент қаласындағы базарларда саудамен айналысатын азаматтардан шетел валютасын жинап, аталған әйелге табыстаған – Ташкент қаласының тұрғыны, 1989 жылы туған азаматтың Ташкент ауданындағы уақытша тұрып жатқан үйі тексерілген.
Нәтижесінде, алдағы уақытта Қазақстанға алып өту үшін дайындалған тағы 399 170 АҚШ доллары табылған.
Жалпы 1 миллион 273 мың 170 АҚШ доллары заттай айғақ ретінде тәркіленген.
Әлемдегі алғашқы теңіз астындағы жоғары жылдамдықты теміржол туннелі іске қосылды – Халық газеті
Қытайда жылдамдығы сағатына 350 шақырымды құрайтын әлемдегі алғашқы жоғары жылдамдықтағы теңіз асты теміржол туннелі сәтті аяқталды. Бұл туралы «Халық газеті» хабарлады.
Қытайлық БАҚ-тың мәліметінше, Шаньтоу-Шаньвэй жоғары жылдамдықты теміржолының Шаньтоу шығанағындағы қос жолақты су асты туннелінің жалпы ұзындығы - 9 781 метр, ал ең терең бөлігі теңіз деңгейінен 98,5 метр төменде орналасқан.
Шаньтоу-Шаньвэй жоғары жылдамдықты теміржолы толықтай пайдалануға берілгеннен кейін, ол көптеген жоғары жылдамдықты теміржолдармен бірге Қытайдың оңтүстік-шығыс жағалауындағы жоғары жылдамдықты теміржол дәлізіне айналады.
Жол Гуандун, Фуцзянь және Чжэцзян өлкелерінің 15 қаласын байланыстырады.
Иран өзінің ғарыш бағдарламасында қандай жаңа рекордтар орнатты – Parstoday
Иран ғарыш ұйымының басшысы хижраның 1403 жылы(2025 жылы) жаңа ғарыш рекордтарының орнатылуына тоқталып, өткен жылы орбитаға бес спутник пен бір зерттеу жүк сәтті шығарылғанын айтқан. Бұл туралы осы аптада Parstoday ақпарат агенттігі хабарлады.
Аталған ақпарат агенттігінің мәліметі бойынша, Иран ғарыш ұйымының басшысы Хасан Саларие Мехр ақпарат агенттігіне берген сұхбатында өткен жылы 3 жерсерікті ұшыруда 6 ғарыштық жүктің орбитаға орналастырылғанын жариялаған.
Оның айтуынша, 1403 жылы(2025 жылы) «Чамран», «Каусар», «Ходход» спутниктері, орбиталық тасымалдау блогы, «Фахр» және зерттеу жүктері жіберілген.
Иранның ғарыш ұйымының басшысы биылғы жылы Иранның ғарыш саласының ең маңызды жетістіктері мен табыстары туралы айтқан.
Оның келтірген мәліметтеріне сүйенсек, Иран ғарыш өнеркәсібінде инфрақұрылым саласында айтарлықтай ілгерілеушілікке қол жеткізген, осылайша Чабахар ғарыш базасы қазіргі уақытта 80 пайыздан астам физикалық ілгерілеуге жетті және осы базаның бірінші кезеңі келесі жылы ресми түрде ашылады деп күтіліп отыр.
Ирандық БАҚ-тың дерегінше, 300 келі массаны орбитаға шығару Иранның ғарыш саласы үшін рекордтық көрсеткіш болып табылады
– Саларие былай деп қосты: «Симурғ» спутниктік тасымалдаушысына қатысты орбитаға шамамен 300 келі масса орналастырылды, бұл Иранның ғарыш саласы үшін рекордтық көрсеткіш. Сондай-ақ Иранның ғарыштық зерттеулер институты салған «Саман 1» орбиталық тасымалдау блогы орбитаға сәтті енгізіліп, оның көптеген ішкі жүйелері алғаш рет орбитада сәтті сынақтан өтті, - деп жазды ParsToday.
Ораза айт күні ақылы жолдар тегін болады – Жэньминь жибао
Ораза айт күні Шыңжаңдағы шағын жолаушылар автокөлігіне дейінгі барлық жеңіл автокөліктерден ақылы жолдарда толықтай жеңілдік жасалады. Бұл туралы Қытайдың Жэньминь жибао ақпараттық порталы хабарлады.
Шыңжаң ұйғыр автономиялы өлкелік халық үкіметінің ресми сайты жариялаған 2025 жылғы мереке, мейрам күндеріндегі демалыс мәлімдемесіне негізделсек, келесі келетін заңда белгіленген мереке күні ретінде Ораза айт мерекесі (31 наурыз күні) болып, 29 наурыздан (сенбі) 31 наурыз күніне (дүйсенбі) дейін жалпы 3 күн демалыс беріледі
Шыңжаң Қатынас-тасымал қаржы қосу тобы вичат әлеуметтік желісінде жариялаған ораза айтта сапарға шығуға қызмет өтеу бағдарнамасына негізделгенде, ораза айт мерекесі күні Шыңжаңда ақы алынатын жолда 7 адамдықтан төмен (7 адамдықты қамтиды) шағын жолаушылар автокөлігінен ақы алынбайды. Ақылы жолдардағы жеңілдік уақыты 31 наурыз күні сағат 00:00-ден сол күнгі сағат 24:00 ке дейін болады.
Айта кетейік, Қытайда Ораза айт мерекесі 31 наурыз атап өтіледі.
Ораза айт пен Чиңмиң мерекесінде жолаушылар пойызы көбейеді – CNR
Ораза айт пен Чиңмиң мерекесі демалысына таяп қалды. Мұның ішінде ораза айт демалысында темір жолдың мереке демалысы кезіндегі тасымал уақыты 28 наурыздан 1 сәуір күніне дейін жиыны 5 күн болып, шамамен 632 мың адам жолаушы тасымалданады. Бұл туралы Қытайдың «Орталық халық радиосы» ақпарат агенттігі хабарлады.
Аталған БАҚ-тың келтірген дерегіне сүйенсек, сонымен қатар Қытайдың Чиңмиң мерекесі демалысында темір жолдың мереке демалысы кезіндегі тасымал уақыты 3 сәуірден 7 сәуір күніне дейін жиыны 5 күн болады. Осы уақытта шамамен 761 мың 100 жолаушы жөнелтіліп, былтырғы осы мерекедегі уақытпен салыстырған 4.9%-ға артады. Сондықтан Шыңжаң темір жол саласының мамандары уақыттық жолаушылар пойызынан 297 кезекші пойызды көбейтіп, жолаушылардың демалыс кезіндегі сапар қажетін толық қанағаттандыруды жоспарлап отыр.
Түркияның «Кітап ауруханасы»: Сирек қолжазбалар қайта жаңғыртылып отыр – TRT
Стамбулдағы тарихи Рами кітапханасының «Шифахана» бөлімінде мамандар ғасырлар бойы сақталып келген сирек қолжазбаларды мұқият қалпына келтіріп, бұл баға жетпес жәдігерлерге жаңа өмір сыйлап жатыр. Бұл туралы осы аптада Түркия Радио Телевизия порталы хабарлады.
«TRT»-ның дерегінше, XVIII ғасырдан қалған бұрын әскери казарма ретінде пайдаланылған тарихи ғимаратта орналасқан Рами кітапханасы 2023 жылы ашылды.
Кітапхана құрамындағы «Шифахана» атты реставрация орталығы Түркия жазба жәдігерлер мекемесіне қарасты жұмыс істейді.
«Кітап ауруханасы» деп те аталатын Шифаханада Османлы түрікшесі, араб, парсы, иврит және орыс тілдерінде жазылған мыңжылдық тарихы бар сирек қолжазбалар қалпына келтіріледі.
Сонымен қатар Ливан сияқты елдерден де реставрацияға арналған шығармалар қабылданады.
Шифахананың жетекшісі доктор Нил Байдардың айтуынша, қалпына келтіру процесі хирургиялық операцияға ұқсайды. Қолжазбаның саулығы – басты мәселе. Сондықтан еңбектерге зиян келтірмей, халықаралық стандарттарға сай жұмыс істеледі.
