Орталық Азия елдері астаналарының жаңа жылдық шыршалары қандай?

Астана

Қазақстанның бас шыршасы 17 желтоқсанда жағылды. Ол Астанадағы ЭКСПО халықаралық көрме орталығының аумағында орналасқан. Биіктігі - 25 метр.

Бас шыршаны жағу кезінде елорда тұрғындары мен қонақтары үшін концерт, жаңа жылдық жәрмеңке, мұз айдыны, лабиринт, фуд-корт, тақырыптық фотоаймақтар және т.б. ұйымдастырылды. Шараға бес мыңға жуық адам қатысты.

Ашхабад

Түркіменстан астанасында 15 желтоқсанда «Әлем» мәдени-ойын-сауық орталығының алаңында орнатылған жасыл шыршаны жағу рәсімі өтті. Шыршаның биіктігі - 44 метр, ал диаметрі - 16 метр. Ол Сібірден әкелінген табиғи шырша бұтақтарынан жасалып, 4 мың ойыншық және 55 мың жарық диодты шамдармен безендірілді.

Шыршаның жоғарғы жағында «2024» деген жазуы бар сегіз қырлы жұлдыз орналасқан. Ол түркімен ұлттық күнтізбесі бойынша келер жылдың нышаны - жүзетін балықтарды бейнелейтін мониторлармен қоршалған.

Бішкек

Бішкекте 15 желтоқсанда елдің бас шыршасының шамы жағылды. Дәстүр бойынша ол Ала-Тоо алаңында орнатылды. Биіктігі - 32 метр, диаметрі - 12 метр.

Шара қонақтары үшін отандық эстрада әншілерінің қатысуымен концерт ұйымдастырылды. Шырша 32 метрлік жарық диодты гирляндалармен жоғарыдан төменге дейін шеңбер бойымен безендірілген.

Душанбе

Душанбеде жаңа жылдың басты атрибуты Тәуелсіздік алаңына орнатылды. Биыл оның биіктігі - 30 метрге, диаметрі 16 метрге жетеді.

Жаңа жыл қарсаңында мерекелік концерт қойылып, отшашу болады.

Ташкент

Бас шырша жылдағы дәстүр бойынша Өзбекстан Ұлттық кітапханасының алдына орнатылды. Оның биіктігі - 35 метр.

Бұл жерде мерекелік шаралар 28 желтоқсан мен 8 қаңтар аралығында сағат 11:00-ден 23:00-ге дейін өтеді.