«Орталық Азия – Еуроодақ» алғашқы саммитіне кімдер қатысады
ТАШКЕНТ. KAZINFORM — «Орталық Азия — Еуропалық Одақ» саммиті 3-4 сәуір аралығында Өзбекстанның Самарқан қаласында өтеді, деп хабарлайды Kazinform агенттігінің меншікті тілшісі.
Алғашқы саммитке Өзбекстан президенті Шавкат Мирзиёев төрағалық етеді. Іс-шараға Еуропалық кеңестің президенті Антониу Кошта мен Еуропалық комиссияның президенті Урсула фон дер Ляйен қатысады. Сонымен қатар «Орталық Азия — Еуроодақ» форматындағы кездесуге Мемлекет басшысы Қасым-Жомарт Тоқаев, Қырғызстан, Тәжікстан және Түрікменстанның президенттері келеді.
Саммит Орталық Азия мен Еуропалық Одақ арасындағы ынтымақтастықты тереңдету мәселелеріне арналады. Оның барысында көлік-логистикалық жобаларды бірлесіп қолға алу, стратегиялық шикізат бағытындағы серіктестік, экологиялық таза және тиімді энергия өндіру көздерін енгізу мүмкіндіктері талқыналады.
— Біз шиеленіс жағдайында өмір сүріп жатырмыз. Осы орайда, Еуроодақ үшін жалғыз шешім — бейбітшілік пен өзара өркендеуге негізделген серіктестік орнату. «Орталық Азия — Еуроодақ» саммиті өңір елдері мен еуроаймақ мемлекеттерінің орнықты дамуына тірек болатын басты ынтымақтастық бағыттарын айқындайтын алаң болмақ, — деп пікір білдірді Еуропалық кеңестің президенті Антониу Кошта саммит қарсаңында.
Еске салайық, былтыр қыркүйекте Шавкат Мирзиёев «Орталық Азия — Еуроодақ» форматындағы алғашқы саммитті Өзбекстанда өтізуді ұсынған болатын.
Бұған дейін Kazinform агенттігіне сұхбат берген Өзбекстанның бұрынғы Сыртқы істер министрі Саидмухтор Саидкасымов Орталық Азияның әлемдік саясаттағы салмағы арта түскенін айтып еді.
Сонымен қатар саммит қарсаңында Өзбекстандағы Орталық Азия халықаралық институтында Еуропа мен Орталық Азиядағы саяси талдау орталықтарының форумы өтті.
