Өскемен тұрғындары ауада химиялық иіс сезілетінін айтып шағымданды

ӨСКЕМЕН. KAZINFORM – Өскемен қаласы тұрғындарының ауада химиялық иіс сезілетінін айтқан шағымына ШҚО Экология департаментінен жауап берді. 

Кешелі бері әлеуметтік желіде Өскеменнің бірнеше шағын ауданында өткір химиялық иіс сезілетіні жайлы шағымдар көп жазылды. Осыған байланысты құзырлы департаменттің мобильді топ мүшелері атмосфералық ауаға аспаптық өлшеу жүргізді. 

— Экологтардың зерттеулері өнеркәсіптік кәсіпорындардың санитарлық-қорғау аймақтарында сертификатталған жабдықтарды пайдалана отырып жүргізілді. Соның нәтижесі бойынша ауада ластаушы заттардың шекті рұқсат етілген концентрациясының асып кету фактісі тіркелген жоқ. «Қазгидромет» РМК филиалының деректері бойынша да стационарлық бақылау бекеттерінде ауаның ластануы анықталмады, - деп хабарлады облыстық Экология департаментінің баспасөз қызметінен. 

Ведомство дерегінше, кей ластаушы заттар санитарлық нормалардан аспайтын шекте ауаға тараса да иісі сезіліп тұрады. 

Еске салсақ, бұған дейін елімізде ерекше қорғалатын 6 табиғи аумақ құрылатыны хабарланған.