Өскеменді тұман тұмшалап тұрғанға ертең 2 апта болады

ӨСКЕМЕН. KAZINFORM — Өскемен қаласын түтін тұмшалап тұрғанына 1 наурыз күні тұп-тура 2 апта болады. 

Кеше қаладағы қолайсыз метеорологиялық жағдай қалыптасқанына (ҚМЖ) 12 күн болды. Желсіз күн бүгін де жалғасты. 

«Қазгидромет» РМК мәліметіне сүйенсек, 28 ақпан сағат 20.00-ден бастап 1 наурыз сағат 20.00-ге дейін Өскеменде екінші дәрежелі ҚМЖ сақталады. Демек, қаланы түтін басып тұрғанына ертең 2 апта болмақ.

Осы уақыт аралығында қаладағы мектеп оқушылары бірде-бір рет онлайн форматқа ауыстырылмады. Бұның себебін «Өскемен тынысы» экологиялық бюросы жобалық кеңсесінің жетекшісі Елена Березинская-Абилова түсіндірген болатын. 

Еске салсақ, бұған дейін Өскеменде ауа сапасын бақылайтын 25 бекет орнатылатындығын жазғанбыз.