Өскемен хайуанаттар бағындағы ағайынды қонжықтар алғаш рет апанынан шықты

ӨСКЕМЕН. KAZINFORM – Өскемен қаласындағы Сол жағалау музей-қорығы кешенінде Шанди есімді аю үш қонжық туды. 

Бұл – сирек кездесетін жағдай. Себебі аюлар әдетте екі қонжықтан асырып тумайды. Қонжықтар қаңтар айының басында дүниеге келді. Олар алғашқы апталарын аналарының қамқорлығымен апанда өткізді. Осы кезде зоологтар кедергі келтірмеу үшін камерамен бақылап қана отырды. 

Бүгін Шанди алғаш рет қонжықтарын апаннан шығарды. Қимылы ебедейсіз маймақтарға айналаның бәрі таңсық әрі қызық. Енді қонжықтарды хайуанаттар бағына келген адамдар да көре алады. 

– Үш бірдей қонжықтың тууы – хайуанаттар бағы үшін өте сирек құбылыс. Ана аюдың өзін жайлы сезініп, балаларына қамқорлық жасап жатқанына қуаныштымыз, - дейді музей-қорығы кешенінің қызметкерлері. 

Зоологтер қонжықтардың жағдайын жіті бақылауды жалғастыра бермек. 

Еске салсақ, бұған дейін Экология министрлігі киік атудан бас тартпақшы екенін жазғанбыз.