Отандық өндірушілерді қолдау үшін реттелетін сатып алу тетігі енгізіледі
АСТАНА. KAZINFORM — Өндіруші кәсіпорындарды қолдау мақсатында елімізде реттелетін сатып алулар тетігі қосылады. Бұл шара жергілікті өндірісті дамытуға, кәсіпорындардың тұрақты тапсырыспен қамтамасыз етілуіне және отандық тауарлардың бәсекеге қабілетін арттыруға бағытталған.
− Кәсіпорындарды қолдап, қолда бар қуатты пайдалану үшін біз жеңіл өнеркәсіптің 1162 тауарын ұлттық режимнен алып тастадық. Реттелетін сатып алулар аясында отандық тауар өндірушілерге басымдық беріледі, жергілікті өндіріс үлесі жоғары өнімдерге тапсырыстар ұлғайтылады. Ұзақ мерзімді келісімшарттар жасалып, кәсіпорындардың тұрақты дамуы үшін кепілдендірілген сұраныс қалыптасады, − деді Өнеркәсіп және құрылыс министрлігі Өнеркәсіп комитеті төрағасының орынбасары Мұхамед Андақов Орталық коммуникациялар қызметінде өткен баспасөз мәслихатында.
Сонымен бірге, импортты алмастыруға бағытталған шаралар қабылданады, ішкі нарықта отандық өнімдерді пайдалану үлесі артады.
Жеңіл өнеркәсіп өнімдерін өндіруге арналған тауарлардың жекелеген түрлерін кедендік баж төлеуден босату қарастырылған.
− Сондай-ақ жеңіл өнеркәсіп кәсіпорындарының анағұрлым арзан және ыңғайлы өндірістік алаңдарға, жалпы инфрақұрылымдық қызметтерге (сумен жабдықтау, электр энергиясы, көлік), жеңілдетілген әкімшілік рәсімдерге, жеңілдетілген салық салу мен қаржыландыруға қол жеткізуі үшін 9 арнайы экономикалық аймақта жеңіл өнеркәсіп тауарлары қызметтің басым түрлері болып енгізді, − деді Мұхамед Андақов.
Айта кетейік, өткен жылы Қазақстанның жеңіл өнеркәсіп нарығы 4,3 млрд АҚШ доллар болып, онда отандық өндірушілердің үлесі шамамен 6% болды. Елімізде жеңіл өнеркәсіпте 1411 кәсіпорын, 803 тігін кәсіпорыны, 481 тоқыма бұйымдарын өндіру және 122 былғары өнімдері кәсіпорындары жұмыс істейді.
Биыл жеңіл өнеркәсіп саласында 600-ге жуық жұмыс орнын құрып, 9 ірі инвестициялық жоба іске асырылады. Оның ішінде Ақтөбе облысындағы жүнді терең өңдеу жобасы, Түркістан облысындағы тоқыма бұйымдарын өндіретін мақта кешені және Шымкенттегі тоқылған шұлық өндіру жобасы бар.
