«Отбасы банк» дербес деректерді жаңарту тәртібін түсіндірді

АСТАНА. KAZINFORM — «Отбасы банк» Бірыңғай республикалық кезекте тұрған азаматтарға арналған дербес деректерді жинауға және өңдеуге келісім беруді рәсімдеудің нұсқаулығын жариялады.

Елорда әкімдігінің мәліметінше, бұл қадам банкке сіздің деректеріңізді дұрыс есепке алуға мүмкіндік береді.

Ол үшін мына іс-әрекеттерді орындау керек:

• Браузерді (Google Chrome, Safari) ашып, orken.otbasybank.kz сайтына кіріңіз.
• «Кіру» түймесін басып, ЭЦҚ арқылы авторизациядан өтіңіз.
• Құпиясөзді енгізіп, кіруді растаңыз.
• Жүйеге кіргеннен кейін «Деректерді жинауға және өңдеуге келісім» терезесі пайда болады.
• Мәтінмен танысып, «ИӘ, мен өтінішпен таныстым» деген құсбелгісін қойып, «ЭЦҚ мен қол қою» түймесін басыңыз. 

Айта кетейік, бұған дейін «Отбасы банкі» «Келешек» бағдарламасы аясында 6 762 кішкентай қазақстандықтың есепшотына 1,6 млрд теңге аударылғанын хабарлады.

Сонымен қатар банк «Наурыз» бағдарламасы бойынша кредит беру үшін KASE-ден 102,7 млрд теңге тартқаны анықталды.