Павлодар тұрғындарының 1,8%-ы қатерлі ісік бойынша есепте тұр
ПАВЛОДАР. KAZINFORM — Өңірде онкологиялық ауруларға 13 778 адам шалдыққан. Қазақстан өңірлері арасында қатерлі ісіктерден болатын өлім-жітім рейтингінде 3-ші орында тұр.
Ертіс-Баян өңірінде жыл басынан қатерлі ісіктің 2 мыңнан астам жағдайы тіркеліп отыр. Қатерлі ісіктермен сырқаттанушылық рейтингінде облыс республикада 4-ші орынға шығып, жыл басынан 678 адам обырдан көз жұмған.
Облыста сүт безі обыры, колоректальды обыр, өкпенің қатерлі ісігі, асқазанның қатерлі ісігі және жатыр мойны обыры жиі тіркеледі. Былтыр аталған онкологиялық аурулардан аймақта 746 адам қайтыс болған. Облыс қатерлі ісікке шалдыққандардың саны бойынша республикада алдыңғы қатардан түспей тұр.
— Жылдың алғашқы 11 айында Павлодар облысында қатерлі ісіктердің 2200 жаңа жағдайы анықталды. Өткен жылдың сәйкес кезеңімен салыстырғанда әдеуір төмен. Дейтұрғанмен науқастардың жалпы саны азайған жоқ. 123 316 адам скринингтен өтіп, оның 137-сінде обыр анықталды. Сүт безі обырына — 98, жатыр мойны қатерлі ісігіне жаңадан 18 әйелдің шалдыққаны белгілі болды. Ал колоректальді қатерлі ісік скринингі бойынша 53 332 скринингтік зерттеулер жүргізіліп, 21 қатерлі ісік анықталды. Өткен жылы қатерлі ісіктен 746 адам, ал жыл басынан 678 адам қайтыс болды. Өкінішке қарай, өлім-жітім рейтингінде 3-ші орында тұрмыз, — дейді облыстық онкологиялық диспансер директорының ұйымдастыру-әдістемелік жұмысы жөніндегі орынбасары Әсел Асқарова.
Атап өту керек, «Павлодар облыстық онкологиялық диспансері» КМК қажетті жабдықтармен жарақтандырылған және білікті онколог дәрігерлер топтасқан өңірдегі жалғыз мамандандырылған онкологиялық мекеме. Диспансердің 2019 жылы ашылған жаңа ғимаратында радиациялық бөлімше, эндоскопиялық бөлімше, екі зертхана, 200 төсек-орынды стационардың жеке корпусы, ультрадыбыстық диагностика бөлімшесі, заманауи операциялық және реанимациялық блок, морфологиялық зертханасы бар патологиялық-анатомиялық бөлімше, интервенциялық жоғары технологиялық зертханаларды жүргізуге арналған бункерлері бар радиологиялық корпус орналасқан. Ауысымына 100 адамды қабылдауға арналған емхана бөлімшесінің жеке ғимараты бар. Заманауи КТ, МРТ аппараттарымен қоса, «Varian Medical Systems» КТ-симуляторы бар желілік үдеткішпен жабдықталған.
Осындай заманауи мүмкіндіктердің арқасында ауруды ерте сатысында анықтау, емдеу мүмкін болып отыр. Мекемеде жыл басынан 8510 пациент емделген. Оның ішінде 5195 адам тәулік бойы жұмыс істейтін стационарда, 3315 пациент күндізгі стационарда ем алып шыққан.
— Соңғы онжылдықта пациенттерге қолжетімді онкологиялық емдеу әдістерін таңдау айтарлықтай кеңейді. Халықаралық стандарттарға сәйкес радикалды хирургиялық емдеу, радиологиялық емдеу, химиотерапия, таргент және иммунотерапия сияқты онкологиялық ауруларды заманауи мамандандырылған емдеудің барлық түрлерін жүргіземіз. Білікті медициналық персонал өзінің кәсіби даярлығын арттыру үшін үнемі жұмыс істейді, бұл диагностика мен емдеуде заманауи тәсілдерді тиімді қолдануға мүмкіндік беріп отыр, — деп әңгімесін жалғастыра түсті маман.
Емдеудің сәттілігі көбіне анықталған аурудың сатысына, науқастың жасына, қатар жүретін ауруларға және өзге де жеке факторларға тәуелді екенін ескеру маңызды. Онкологтардың сөзінше, ерте сатыдағы қатерлі ісік 80-90% жағдайда толық емделеді екен. Сондықтан ерте диагностиканы онкологиялық аурулармен күресудің негізгі кезеңі деп қабылдаған абзал.
— Аурудың ерте сатысында онкологиялық ауруларды емдеу әлдеқайда жеңіл. Қатерлі ісікті ерте анықтау кезеңдерінің бірі — скринингтік бағдарламалардан өту және АПВ вакцинациясын жүргізу. Елімізде жатыр мойны обыры әйелдердегі онкопатология арасында екінші және барлық неоплазиялар арасында бесінші орында тұр. Қазіргі уақытта АПВ вакцинациясын және скрининг арқылы қайталама профилактиканы қолдана отырып, бастапқы профилактика арқылы жатыр мойны обырын бақылаудың тиімді әрі дәлелденген әдістері бар. Қалған қатерлі ісіктер белгілеріне сүйене отырып анықталады, — дейді Әсел Тоқмағамбетқызы.
Сондай-ақ, бүгінгі күні Қазақстанда қатерлі ісіктердің үш скринингі бар: жатыр мойны обыры, сүт безі обыры, колоректальді обыр. Скринингтен өту тегін. Скринингтен өту үшін тұрғылықты жері және тіркелген жері бойынша емханаға жүгіну қажет.
Денсаулық сақтау кодексінің талаптарына сәйкес азаматтар өмір жасының әр кезеңінде әртүрлі дертті ерте анықтау мақсатында скринингке шақырылады. Бұл тексеру — ауруды алдын ала анықтап, оңтайлы емдеу әдісін таңдауға, уақтылы ем-дом қабылдауға көмек. Бұған қоса облыстық диспансерде ай сайын «Ашық есік» күндері өткізіліп, мамандар келушілерге түрлі консультация береді. Осыны пайдаланып, тұрғындар денсаулығын күтудің жолдарын іздестіргені абзал.
Бұған дейін хабарлағанымыздай, Ақмола облысының прокурорлары 100-ден астам онкологиялық науқастың құқығын қорғады.
