Павлодарда қамшы өру өнері жаңғырды
ПАВЛОДАР. KAZINFORM — Облыс орталығында қамшы өруден сайыс өтті. Қатысушылар ұмыт болып бара жатқан ұлттық өнерді қайта жаңғыртып, қайыс таспаларынан түйін түюден шеберліктерін көрсетті.
Бұқар жырау атындағы әдебиет және өнер музейі мектеп оқушыларының қолөнерге деген қызығушылығын арттыруға ден қойып келеді.
— Сайысты Наурыз мейрамына орай ұйымдастырдық. Қамшы өру өнерін насихаттау арқылы ер балаларды ұлттық қолөнерді күнделікті өмірде қолдана білуге үйрету, шығармашылыққа жетелеу, ізденісін дамыту, қазақтың ұлттық өнеріне деген жастардың зейінін арттыру көзделді, — дейді музей басшысы Ербол Қайыров.
Байқау екі кезеңнен тұрды. Алғашқысында 10 қатысушы қазылар алқасына өзі өріп әкелген қамшыларын таныстырып, жасалу әдістерін баяндады. Ал екінші кезеңге өткен 5 қатысушы қайыс таспаларынан қамшы өру шеберліктерін көрсетті.
— Мен жастайымнан жылқы баққан адаммын. Халқымыз ежелден жігіттің бес қаруы бойында болуы керек деп білген. Қамшының қасиетін, қолдану ерекшелігін үлкендерден үйреніп, жадымызға түйіп өстік. Мәселен, жылқышылар қамшының бүлдіргісін сабының ең ұшынан салады. Себебі жылқыға бұғалық салу кезінде қамшыны сол қолымызға ұстауға ыңғайлы, — дейді қамшы өрудің шебері, қазылар алқасының мүшесі Жаңбырбай Әубәкіров.
Байқау қорытындысында Ы. Алтынсарин атындағы дарынды балаларға арналған облыстық қазақ гимназия-интернатының 10 сынып оқушысы Бижан Тасқынұлы жеңімпаз атанды. Павлодар қаласының № 29 орта мектебінің оқушысы Самат Нұрсұлтан екінші, Әлихан Бөкейхан атындағы лицей-мектебінің оқушысы Қабдолбек Аят үшінші орынға ие болды.
Еске сала кетейік, Көкшетауда Ұлттық киім фестивалі өтті.
