Педагогтердің жұмысын жеңілдететін қандай өзгерістер енгізіледі
АСТАНА. KAZINFORM – Портфолио жинақтау және авторлық бағдарламаға қатысты бірқатар өзгеріс болмақ. Бұл жөнінде Оқу-ағарту министрі Instagram парақшасында бөлісті.
Жұлдыз Сүлейменованың айтуынша, портфолио жинақтау жеңілдейді.
– Портфолио жинақтау енді электронды негізде болады. Сіз ұстаз ретінде қағаз, әркімнен қол жинап жүрмейсіз. Қазір Ustaz платформасын қарастырып жатырмыз. Мұның барлығы электронды болады. Ол туралы қосымша хабарлаймыз, - деді ол.
Сондай-ақ ұстаздар енді авторлық бағдарлама дайындап, әуреге түспейді.
– Тағы бір мәселе – авторлық бағдарлама. Сіздермен оны ұзақ талқыладық. Авторлық бағдарламалар да тоқтатылады. Енді авторлық бағдарламаны жазудың, ұсынудың қажеті жоқ, - деді министр.
Айта кетейік бұған дейін мұғалімдердің пәндік білімін бағалау тесті тоқтатылатынын жазғанбыз.
