Петиция: шекті дауысты 50 мыңнан асыру талқыланып жатыр
АСТАНА. KAZINFORM – Мәдениет және ақпарат министрі Аида Балаева онлайн петицияға қатысты олқылықтарды қайта қарауға дайын екендігін айтты.
«Шекті дауысты жинаған петициялардың мемлекеттік органдардың деңгейінде талқыланып жатқаны онлайн петиция жүйесінің нәтижелі болғанын көрсетеді. Егер олқылықтар болған жағдайда біз өзгерістер енгізуге дайынбыз. Шекті дауысқа келсек, 50 мың дауысты бір күнде немесе ұйымдасқан түрде жасалынуы мүмкін деген сұрақтар туындады, сондықтан біз оны көбейту мәселелерін талқылап отырмыз», - деп жауап берді Аида Балаева агенттік тілшісінің сауалына Мәжіліс қабырғасында.
Айта кетсек, биыл қыркүйекте елімізде петиция институтының құрылғанына 1 жылдан астам уақыт өтті. Осы аралықта арнайы әзірленген epetition.kz порталында орналастырылған 102 петицияның тек 4-еуі ғана өтінішті қарау үшін қажетті ел азаматтарының қолын жинай алған екен.
Еске салайық, қазақстандықтар белсенді қатысып, кең талқыланған «Уақытты кері қайтару» петициясы болды. Дегенмен Сауда және интеграция министрлігі петиция талабын орындаудан бас тартты.
