Президент тапсырмасы: Үкімет тобы ақтөбелік көпбалалы аналармен кездесті
Атырау, Батыс Қазақстан облыстарын аралап, көпбалалы, тұрмысы төмен отбасылармен кездескен Үкіметтің жұмыс тобы қазір Ақтөбе облысында жүр. ҚР Премьер-министрінің орынбасары Гүлшара Әбдіқалықова бастаған топ құрамында Денсаулық сақтау министрі Елжан Біртанов, Білім және ғылым министрі Күләш Шәмшидинова, Еңбек және халықты әлеуметтік қорғау министрі Бердібек Сапарбаев, ҚР Индустрия және инфрақұрылымдық даму министрлігі, құрылыс және тұрғын үй-коммуналдық шаруашылық істер комитетінің төрағасы Мархабат Жайымбетов бар.
«Алдағы 2-3 жылда әлеуметтік мәселелерге қосымша 2,3 триллион теңге қаржы қарастырылып отыр. Біріншіден, ең төменгі табыс деңгейін көтеріп, ең мұқтаж отбасыларға көмек көрсету керек. Екіншіден, білім, денсаулық саласындағы сапаны арттыру және баспанамен қамтамасыз ету қарастырылады. Үшіншіден, өңірлік даму, яғни, жол салып, газ, сумен қамтамасыз ету қажет. Жаңа әлеуметтік бастамаларды бәріміз бірге іске асыруымыз керек. Бұл тек мемлекет тарапынан атқарылатын іс-шаралар емес, қоғамдық ұйымдар мен Nur Otan партиясы, жастар, ақсақалдар, зиялы қауыммен бірге атқарылатын жұмыс», - деді Премьер-министрдің орынбасары Гүлшара Әбдіқалықова.
Жұбановтар әлемі ғимаратында өткен көпбалалы, мұқтаж отбасылармен кездесу кезінде Еңбек және халықты әлеуметтік қорғау министрі Бердібек Сапарбаев жәрдемақыны есептеу, жалақы жайын айтып берді. Қазақстанда 1 миллионға жуық бюджет қызметкерінің жалақысы көбейеді. Олар: білім, денсаулық, спорт, әлеуметтік сала қызметкерлері. Қазір Ақтөбе облысы бойынша 30 мыңға жуық отбасы атаулы әлеуметтік көмек алатыны белгілі болды.
«Ақтөбеде ашық есік күндері өтті. Барлығы 5 мыңнан астам тұрғын келіп, 6 мыңға жуық сұрақ берді. Көбі тұрғын үй, несие өтеу, мемлекеттік жеңілдік алу мәселесін қойды. Демеушілердің де көмегіне жүгіндік. Барлығы 877 мұқтаж отбасыға 50 миллион теңгеге көмек көрсетілді», - деді облыс әкімі Оңдасын Оразалин.
Айта кетейік, кездесу кезінде Білім және ғылми министрі Күләш Шәмшидинова үш жылда Ақтөбеде 9 мектеп салынатынын айтып берді.