Президент Тоқаев футболдан Қазақстан құрамасын жеңісімен құттықтады

АСТАНА. ҚазАқпарат - Мемлекет басшысы Қасым-Жомарт Тоқаев футболдан Қазақстан ұлттық құрамасын Еуро-2024 чемпионатының іріктеу кезеңінде Солтүстік Ирландия командасымен өткен матчтағы жарқын жеңісімен құттықтады. ҚазАқпарат бұл туралы Ақордаға сілтеме жасап хабарлайды.

«Жеңіс құтты болсын! Бүгін жақсы ойын болды. Шеберлік көрсеттіңіздер. Жұрт, бәрі риза», - деді Қ.Тоқаев.

Өз кезегінде футболдан Қазақстан ұлттық құрамасының капитаны Асхат Тағыберген көрсеткен қолдауы үшін Президентке алғыс айтып, команда атынан доп сыйлады.

Сондай-ақ Мемлекет басшысы матчтағы жалғыз гол авторы Максим Самородовқа ризашылығын білдірді. «Жақсы гол соқтың. Маған ұнады», - деді Қ.Тоқаев футболшының қолын алып жатып.

Еске салайық, Қазақстан - Солтүстік Ирландия матчы бүгін, елордадағы «Астана - Арена» стадионында өтті.

Ойынды Мемлекет басшысы Қ.Тоқаев пен кәсіпқой боксшы Геннадий Головкин трибунадан бірге тамашалады.

Тартысты кездесу қазақстандықтардың пайдасына 1:0 есебімен аяқталды. Жалғыз голды шабуылшы Максим Самородов соқты.