Президент ТРК және Үндістанның хабар тарату корпорациясы серіктестікті дамытады

АСТАНА. KAZINFORM — Үндістанның «Prasar Bharati» хабар тарату корпорациясының бас директоры Гаурав Двиведи бастаған делегация ҚР Президенті Телерадиокешенінің кеңсесіне келді.

Кездесуге қатысушылар Президент ТРК мен «Prasar Bharati» арасындағы кәсіби байланысты дамыту бойынша болашақ ынтымақтастыққа қатысты мәселелерді талқылады. Әңгімелесу барысында Қазақстан мен Үндістан арасындағы өзара туристік сапарлардан бастап, мемлекет көшбасшыларының қарым-қатынасына дейінгі барлық деңгейдегі өзара іс-қимыл жайы атап өтілді.

Екіжақты қатынастардың маңызды бағыты — БАҚ саласындағы ынтымақтастықты дамыту болды. Үндістанның «Prasar Bharati» хабар тарату корпорациясының делегациясы Президент ТРК-ін 2025 жылдың мамыр айының басында Мумбайда өтетін алдағы Дүниежүзілік аудиовизуалды және ойын-сауық технологиялары саммитіне (WAVES) қатысуға шақырды. WAVES саммиті медиа индустрия өкілдерін біріктіретін Үндістанның халықаралық серіктестіктерді нығайту бастамасы. Саммит қатысушыларына медиа саласының заманауи сын-қатерлерін талқылауға, озық тәжірибелермен алмасуға және жаңа іскерлік байланыстар орнатуға мүмкіндік беріледі.

ҚР Президентінің телерадиокешені — құрамына Jibek Joly, Silk Way, Silk Way Cinema телеарналары, Қазақстандағы ең көне «ҚазАқпарат» Халықаралық ақпарат агенттігі және деректі кино орталығы кіретін Қазақстанның ірі медиа компанияларының бірі.

Prasar Bharati (Үндістанның хабар тарату корпорациясы) — штаб-пәтері Нью-Делиде орналасқан Үндістанның мемлекеттік қоғамдық хабар тарату компаниясы. Парламент заңнамасына сәйкес құрылған автономды орган. Ол Doordarshan-хабар тарату компаниясынан және All India Radio — хабар тарату компаниясынан тұрады.

Осыған дейін Президент ТРК журналистері Al Jazeera медиа институтында тағылымдамадан өткенін жазған едік.