Qazaq Banki-нің бұрынғы акционері Бақыт Ибрагимнің зәулім үйі сатылымға шығарылды

АЛМАТЫ. KAZINFORM – Бақыт Ибрагимге тиесілі болған зәулім үй сатылымға шығарылды.

Бұл туралы хабарландыру e-qazyna.kz порталында жарияланды.

Жалпы аумағы 553,6 шаршы метр. Жылжымайтын мүлік Бостандық ауданындағы Қарғалы ықшам ауданы 2-көше, 48-үй мекенжайында орналасқан. Сонымен қатар, 0,14 гектар жер учаскесі мен қосымша шаруашылық құрылыстары да бірге сатылады.

Нысаның жалпы құны – 460,6 миллион теңге. Сауда 26 наурызда басталады, кепілдік жарнасы – 69 миллион теңгеден асады.

Бастапқы бағасы – 1,3 млрд теңге.

Бұл зәулім үйдің марқұм Бақыт Ибрагимге тиесілі екенін Алматы әкімдігінің баспасөз қызметі растады.

Бұған дейін Qazaq Bank акционері Бақыт Ибрагим қайтыс болғаны туралы жазған едік. 

Кейін Полиция департаменті қазақстандық кәсіпкер, Qazaq Bank-тің бұрынғы акционері Бақыт Ибрагимнің өліміне қатысты қылмыстық істің тоқтатылғанын мәлімдеді.

Еске салайық, 2018 жылы халықаралық іздеу жарияланған Бақыт Ибрагим Германиядан экстрадицияланған болатын. Ол «Bank RBK» АҚ-нан аса ірі көлемде ақшалай қаражатты алаяқтық жолмен жымқырды деген күдікке ілінген болатын.