Ресейліктерге берілген ЖСН-нің бір бөлігі рәсімді бұза отырып рәсімделген
АСТАНА. KAZINFORM — Ресейліктерге берілген ЖСН-нің бір бөлігі рәсімді бұза отырып рәсімделген. Бұл туралы Ішкі істер министрлігі Көші-қон қызметі комитетінің төрағасы Аслан Аталықов айтты.
— Заңнамаға сәйкес бізде ЖСН өкілетті органның өтінішімен күшін жояды. Егер ЖСН рәсімдеу барысында рәсімдеу мәселесінде қателіктер болса, онда ЖСН күшін жояды. Немесе, айталық, Ресей Федерациясының азаматы Қазақстаннан шығып кетіп, енді қайтып келмеуі мүмкін. «ЖСН-ді шартты түрде шығару» деген түсінік бар. Жалпы, ЖСН не үшін қажет? Ол қай елден келгеніңе қарамастан банк картасын рәсімдеу үшін керек. Демек, оларға қызметтер қолжетімді болуы үшін. Егер адам Қазақстанда тұрмаса, онда оған ЖСН қажет емес және ол ЖСН күшін жояды, — деді ол Орталық коммникациялар қызметіндегі брифингте БАҚ өкілдерінің сауалына орай.
Сонымен қатар комитет төрағасы «ресейліктер алған ЖСН-дердің жаппай күшін жою жүргізіліп жатыр» деген ақпаратқа қатысты да пікірін білдірді.
— ЖСН-нің бір бөлігі рәсімдеу ережелерін бұзу арқылы рәсімделген кезең болды. Оларға қатысты тексеру іс-шарасы жүргізіліп жатыр. Қылмыстық іс жүргізу кодексінің 201-бабына сәйкес ол жайында егжей-тегжейлі ақпарат бере алмайтындығымыз түсінікті, — деді Аслан Аталықов.
Бұған дейін Қазақстан былтыр 435 408 адамға ұялы байланыс операторына тіркеліп, банк картасы мен шотын ашуға мүмкіндік беретін жеке сәйкестендіру нөмірін бергенін жазған едік.
