Румыниядағы сайлау: билеуші социал-демократтар көш бастап тұр

БУХАРЕСТ. KAZINFORM – Румыниядағы парламенттік сайлауда бюллетеньдердің шамамен 98 пайызын өңдегеннен кейін PSD 23 пайыз дауыспен тізімде көш бастады. Бұл туралы DW жазды.

Жексенбі, желтоқсанның 1-і күні Румынияда өткен парламенттік сайлауда сайлау учаскелері жабылғаннан кейін, елдің билеуші Социал-демократиялық партиясы (PSD) жарияланым кезінде ең көп дауыс жинап отыр.

Интернеттегі дауыстарды санау деректеріне сәйкес, бюллетеньдердің шамамен 98 пайызын өңдегеннен кейін PSD 23,07 пайыз дауыс алды. Одан кейін 18 пайыз дауыспен әсіре оңшыл «Румындар бірлігі үшін альянс» (AUR) тұр, одан кейін 14,55 пайызбен Ұлттық либералдық партия үшінші орында.

Сайлаудың түпкілікті нәтижелері exit poll арқылы расталса, PSD басқаратын батысшыл коалиция үкіметті құру үшін парламентте жеткілікті орынға ие болуы мүмкін.

Румынияның социал-демократиялық премьер-министрі Марчел Чолаку ел «өз болмысын, ұлттық құндылықтары мен сенімін қорғай отырып, еуропалық жолын жалғастыруы керек» деді.

Төрт жыл мерзімге Парламент депутаттарын сайлау партиялық тізім бойынша өтеді. Партияның парламентке өту шегі – 5 пайыз. Сайлауға барлығы 31 саяси партия қатысуда.

Айта кетейік, бұған дейін Румыниядағы парламенттік сайлауда халық жоғары белсенділік танытып жатқанын жазған едік.