Сабақ үстінде оқушыны ұрған мұғалімге қандай шара қолданылды

АСТАНА. KAZINFORM – Сыныпта педагогтің шәкіртіне балағат сөз айтып, қол көтерген видеосы желіде тараған еді. 

Оқиға елорда мектептерінің бірінде болған. Қалалық Білім басқармасының баспасөз қызметі бұл жайтқа қатысты түсініктеме берді. 

Ведомствоның мәлімдеуінше, аталған фактіге байланысты қызметтік тексеріс жүргізілген.

– ҚР Еңбек кодексінің 52-бабы, 1-тармағы, 14-тармақшасына сай, яғни «Тәрбиелеу функцияларын атқаратын жұмыскер осы жұмысын жалғастырумен сыйыспайтын, моральға қайшы қылықтар жасаған» нормасына байланысты педагог жұмыстан босатылды, - делінген хабарламада.

Сондай-ақ мектеп директоры мен оның орынбасарына ресми түрде тәртіптік жаза қолданылды.

Еске сала кетейік, бұған дейін Ақтөбеде самокатты жалға беру бизнесін ұйымдастырған мұғалім сотталғанын хабарлаған едік.