Садақ атудан Ербол Тәпенов пен Қасымхан Қанат күміс және қола медаль алды
АСТАНА. KAZINFORM — Бүгін 5-ші Дүниежүзілік көшпенділер ойындарында Дәстүрлі садақ ату бойынша Қалқан нысанасын көздеуден сайыс өтті. Онда екі отандасымыз – Ербол Тәпенов пен Қасымхан Қанат күміс және қола медаль жеңіп алды.
Қалқан нысанасын көздеуде ерлер 60 метр, әйелдер 50 метр қашықтықта нысана көздейді. Мұнда әр спортшыға 7 мүмкіндіктен беріледі, әр мүмкіндікте 3 минут уақыт болады және 7 жебе атылады.
Жарыс қорытындысы бойынша ерлер арасында мажарстандық Ласло Кочка алтын, қазақстандық Ербол Тәпенов күміс және Қанат Қасымхан мен моңғолиялық Цэвээн Худерчулуун қола жүлде алды.
Әйелдер арасында бүгін қазақстандық спортшылар финалға шыға алмады, алтын медальді – индонезиялық Сури Рено, күміс медальді ресейлік Анна Алексеева және қола жүлдені мажарстандық Барчай Николет Илона мен қырғызстандық Әсел Садырова алды.
Айта кетейік, кеше Дәстүрлі садақ атудан Пута нысанасын көздеуде қазақстандық спортшылар бір алтын, екі қола медалін жеңіп алды.
Ертең жамбы стилінде садақ ату жарыстары өтеді және 12 қыркүйекке жалпы командалық жарыстар жоспарланған.
