Самарқанд «Орталық Азия – Еуропа Одағы» саммитіне қалай дайындалып жатыр - фоторепортаж
САМАРҚАНД. KAZINFORM – Самарқанд қаласы «Орталық Азия – Еуропа Одағы» алғашқы саммитін қабылдайды, деп хабарлайды Kazinform агенттігінің меншікті тілшісі Әлихан Асқар.
Кешеден бері өзбек тарапы аталған іс-шараға қатысу үшін келіп жатқан шетелдік делегаттарды қарсы алып жатыр. Самарқандтағы әдеттегі мамыражай тіршілік осы күндері қарбаласқа ұласты. Көшелердегі қауіпсіздік шарасы қатаңдатылып, құқық қорғау органдарының қызметкерлері күшейтілген жұмыс режиміне көшті.
Атап айтқанда, бүгіннен бастап қалаға кіретін жолдар жабылды. Транзиттік жүк көліктеріне шаһарды айналып өтетін маршруттар ұсынылып жатыр. Сонымен қатар, 4 сәуірде Самарқандтың 10-нан астам көшесі жабылады. Бұған қоса, 1 сәуірден бастап студенттер қашықтан оқып жатыр.
Әуежайдан бастап қаладағы барлық көше бойына Орталық Азия елдерінің тулары ілінді.
Өзбекстан президенті мәртебелі меймандарды қарсы алу үшін 2 сәуірде Самарқандқа келді. Кеше Шавкат Мирзиёев Еуропалық кеңес президенті Антониу Коштамен екіжақты кездесу өткізді. Ал бүгін Өзбекстанға Еуропалық комиссия президенті Урсула фон дер Ляйен және Еуропалық қайта құру және даму банкінің президенті Одиль Рено-Бассо ұшып келді.
Сонымен қатар бірер сағат бұрын Президент Қасым-Жомарт Тоқаев мінген борт Самарқанд әуежайына қонды. Мемлекет басшысын Өзбекстанның премьер-министрі Абдулла Арипов күтіп алды.
Бүгін Қасым-Жомарт Тоқаев Еуропалық кеңес президенті Антониу Кошта және Еуропалық комиссия президенті Урсула фон дер Ляйенмен кездесу өткізеді.
Ауқымды іс-шара ертең, яғни 4 сәуірде «Congress center» ғимаратына өтеді. Оның барысынан 150-ден астам белді шетелдік басылым мен телеарналардың тілшілері хабар таратпақ.
Саммит аясында көлік-логистикалық жобаларды бірлесіп қолға алу, стратегиялық шикізат бағытындағы серіктестік, экологиялық таза және тиімді энергия өндіру көздерін енгізу мүмкіндіктері талқыналады.
Қоса кетейік, таяуда Kazinform агенттігіне сұхбат берген өзбекстандық саясаттанушы Равшан Назаров Еуроодақ Орта дәліздің әлеуетіне қызығушылық білдіріп отырғанын мәлімдеп еді.
Еске салсақ, «Орталық Азия – Еуропа Одағы» форматындағы алғашқы саммит былтыр көктемде өтуі тиіс болған. Дегенмен ол Еуроодақтың басшылық құрамындағы өзгерістерге байланысты кейінге қалдырылды.
