Сандуғаш Кенжебаева Анталиядағы жарыстың жеңімпазы атанды

АСТАНА. KAZINFORM – Қазақстандық теннисші, 19 жастағы Сандуғаш Кенжебаева жұптық сында Анталия (Түркия) ITF W15 турнирінің чемпионы атанды.

Қазақстандық спортшы түркиялық Илай Йорукпен бірге жарыстың 2-ракеткасы болып тіркелген еді.

С.Кенжебаева – И.Йорук финалда доданың 1-ракеткалары, германиялық Мина Ходжич – швейцариялық Мари Меттраукспен бас жүлдені сарапқа салды.

Бірінші партияда қазақстандық-түркиялық жұп сәтті ойнады – 6:4.

Екіншісінде қарсыластары есе қайырды – 5:7.

Есесіне супер тай-брейкте Сандуғаш пен Илай жеңісті жұлып алды – 10:8.

Финалдық матч сағат жарымға жуық уақытқа созылды.

Тағы бір қазақстандық, 20 жастағы Аружан Сағындықова ресейлік Мария Головинамен бірге Монастир (Тунис) ITF W15 жарысының финалында ұтылып қалды.

Қазақстандық-ресейлік дуэт соңғы бәсекеде ғана словениялық Зива Фолкнер – сербиялық Елена Миловановичке жол берді – 4:6, 4:6.

Еске сала кетейік, бұдан бұрын қазақстандық теннисшілердің ITF турнирлерінде чемпиондық атақ үшін таласатынын жазған болатынбыз.

Сондай-ақ Денис Евсеев Португалиядағы жарыстың финалына шықты.